商台前營運總裁蔡東豪（圖），早前去咗一家非常專門嘅科技公司精電國際做行政總裁，精電做嘅係液晶體顯示板，馬場嘅賽果顯示板都係由精電做。由於太專門，一直以來佢只係一隻基金股，普通股民唔多識。不過，做過商台營運總裁，又用過筆名「原復生」寫財經專欄嘅東尼．蔡做咗揸弗人，自然引起更多人嘅興趣。
蔡生噚日出席精電業績記者會，佢冇乜講商台嘅嘢，只係話雖然佢唔係紅褲子出身，但係上任個幾月，已跟主席張樹成周遊列國，四處探訪精電嘅廠房同生意夥伴，一日比一日更熟悉精電咁話喎。佢重叫大家畀啲時間佢，攞啲好成績出嚟畀大家睇吓咁話。
又減持股權，又放晒風會退休嘅張樹成，噚日大派定心丸，叫大家放心，佢老人家雖然年紀大咗啲，但係都未咁快退休，佢會默默咁喺背後支持精電，同埋新上任嘅東尼。唔知早前掟貨嘅基金界人士，聽到佢哋嘅說話收唔收貨呢？
傳真︰2623-9278
電郵︰[email protected]