大狀黨噚日發起沉默遊行，佢哋嘅家人亦喺背後默默支持，好似余若薇嘅醫生老公胡健維、湯家驊太太楊蕙蘭（Daisy）、梁家傑太太陳淑儀（Carol）同梁太嘅孖生妹妹Rita，都有參與。胡醫生話佢對釋法好唔滿意，搞到「香港都冇咗個法庭」，為咗參加遊行，佢噚日特登睇少幾個病人，提早半粒鐘收工。
本身都係律師嘅Daisy就同八方講，好痛心政府又釋法，基本法唔容許政府繞過法院提請釋法，佢擔心市民開始習慣釋法，唔明白𠵱家形勢其實好嚴峻。Carol噚日就同孖生妹妹Rita一齊撐老公。
Carol喺港大法律學院做兼職搞發展，噚日都好多港大學生嚟撐場。而Rita就喺政府度做教育。Rita話，家傑哥都好欣賞家姐，為咗照顧一對孖仔同個女，唔做全職工。
傳真︰2623-9278
電郵︰[email protected]