港股、亞太區股市與歐洲股市，三災八病，點解會咁，人人都知。33隻恒指成份股，冇隻升。38隻國指成份股，得燕化（325，本月29日最後交易）有私有化作價頂住，冇升冇跌。30隻紅指成份股，得隻深圳控股（604）升1格。是日咁跌法，自然係P輪天下，𠵱家至高價追P輪，最好諗過先。
恒指C輪3795：7月尾同日到期嘅熱門恒指C輪，有3795、3775同埋3763。比較上嚟，3795數據略勝，博大市短期反彈，揀3795。隻輪輪價3.1%，槓桿率36.1倍（有效16.9倍），引伸波幅15.5%。條數咁計，恒指每變動100點，3795向上或下移動13%左右。個市風高浪急，短期每日郁動一二百點，閒過立秋，所以3795唔會牛皮，贏輸即時見功，控制注碼好重要。遠期一啲嘅恒指C輪，可揀3963。
中移動C輪4571：中移動（941）散落25.10元，報銷0.85元，昨日所提嘅P輪3655，大升37%，但炒家都知道，唔易賺錢，開市時已裂口嘜高，買到平貨者好少。
中移動若再跌，反手做「兵」唔做「賊」，低位買C輪，主角係4571，6月尾到期，輪價9.3仙，溢價2.5%，槓桿率27倍（有效13.9倍），引伸波幅21.5%。
新地C輪4643：新地（016）收71.25元，跌1元，有可能再下試70元邊邊。如果下跌，低買C輪博反彈。如果即時回升，則唔做嘢，小心升完再跌。
喺低位博反彈嘅正路之選，係4643，6月初夠鐘，輪價26.5仙，溢價2%，槓桿率26.9倍（有效17.1倍），引伸波幅18.7%。4631亦係對象，呢隻波幅細過4643。
章盛