【本報訊】海洋皇宮二百多名員工追薪弄得全城鬧哄哄，代表飲食界的立法會議員張宇人昨日卻公開表示，老闆會投資失誤，也會經營不善，而員工也需要承擔「搵錯老闆」的風險。他的一番惹火言論即引來市民及勞工界炮轟，更有市民指摘他身為議員，竟公然漠視《僱傭條例》列明按時支薪是僱主的基本責任。 記者：譚暉
早年曾經是海洋皇宮大酒樓股東兼董事總經理的張宇人，昨日在商台節目《在晴朗的一天出發》中揚言，「飲食業一直都係有生意時、大家收入多啲；冇生意就收入少啲。員工點會唔負擔風險？你搵錯老闆、個老闆投資失誤、老闆經營不善，呢啲都係風險。」
張宇人聲言，本港每年有一萬二千間食肆開張，也差不多每天都有食肆結業，大部份都守法支付員工薪金，業界並無濫用破產欠薪保障基金，「況且破欠唔係納稅人嘅錢，係來自商業登記，佢哋（其他僱主）都冇人出聲！」
他的一番言論隨即惹來多名聽眾的不滿。陳先生批評張的講法令人反感，因為工資是員工的基本權益，「僱主唔畀錢，重理直氣壯走出嚟咁講，特別重係立法會議員，叫我哋點教細路吖？」在內地設廠的馬先生也說：「做老闆，就應該照顧工人嘅人工。」他支持港府建議飲食業在開業前須繳付保證金。
另一名來自製造業的僱主林先生也說：「話員工都要冒風險，簡直狗屁不通！」另一位陳先生則斥責張宇人的言論有失議員身份，「法例講明七日內要支薪，張宇人嘅講法不知所謂，枉為立法會議員。」
職工會聯盟幹事潘文瀚批評，張宇人的言論荒謬。他說員工幫僱主打工，付出的勞力須按合約得到回報，所以僱主的基本責任是支付薪金；「員工唔係老闆嘅生意夥伴，佢將員工嘅身份同商業夥伴一齊講，係混淆視聽。」
張宇人其後向本報解釋，不排除僱主會投資錯誤，導致員工收入減少、遲出糧、少出糧、減薪等的情況，「呢啲係無可避免嘅。」他強調只想說明任何人、做任何事都有風險。