呢期PSP成全城話題，潮友個個爭住入貨，競爭對手任天堂為求緊守市場，以大量創意有趣嘅Game迎戰；繼《食鬼》同《星之卡比》後，Fans期待已久嘅《任天狗》亦熱辣登場，隻Game用盡NDS輕觸屏幕、咪高峯等獨特功能，創作出虛擬養狗遊戲，可愛度絕對媲美真狗，重可一嘗好多平時「見到唔會買、買咗養唔掂」嘅狗品種㖭！
記者、攝影：許福合
ImageGirl：Kennis
遊戲類型：育成
對應機種：NDS
遊玩人數：1人（2人連線）
售價：約$320
開發商：任天堂
(c)2005Nintendo
3個版本15款小狗
《芝娃娃與朋友們》
芝娃娃?查理斯王騎士犬?拉布拉多?西施?比高
《柴犬與朋友們》
柴犬?迷你牧羊犬?威爾斯哥基犬?迷你品犬?玩具貴婦犬
《臘腸犬與朋友們》
迷你臘腸狗犬?迷你史納莎?德國牧羊犬?約瑟爹利?八哥
今次隻《任天狗》（Nintendogs）因為玩法創新，一開始就受到唔少機迷注意，不過因為頭批返貨唔多，場內價開賣約$320左右，不過有行內表示呢隻Game炒味極濃，售價可能會向上提升，所以有心買番隻玩吓，就要快手，否則就要捱貴貨！
比較特別嘅係《任天狗》分3個唔同版本，每個版本都各有5隻不同品種小狗可以飼養，當中包括小Q（拉布拉多）、Snoopy（比高）呢啲人氣狗仔！提議各位預先想好養邊隻，再揀個版本嚟玩。若果你好似筆者一樣，對狗唔太熟悉，只會從「外表」選擇，就可以從包裝盒後面挑選，上面有晒狗仔外形，毋須擔心買錯狗！
用筆輕撫小狗至冧
遊戲內小狗嘅動作及反應都相當之逼真，充份發揮NDS硬體機能。而養狗最基本要餵食同訓練，操作則透過輕觸屏幕進行，如用筆撫摸小狗，或呼叫小狗回來，增加彼此友誼。接着就教小狗學習畀手、坐下等動作，基本上不論中英日文都可錄成指令。玩家除咗作為一名基本狗主外，更可以帶愛犬出外參賽。比賽內容包括跳高取飛碟、障礙賽等，勝出後可獲得金錢。賺錢有咩用呢？原來可以去Shopping！買吓狗糧、必需品等，亦可買飛碟、網球等小道具給小狗玩，間中還要帶小狗去公園散步、洗澡，同現實中嘅狗主無咩分別！最正係透過通訊連線，可獲取其他人養緊嘅小狗資料，賺到錢後就可買到該隻狗，不過每日只可交換一次。
環境清靜較易辨聲
《任天狗》大量使用語音系統喺遊戲內，不過就差點考起筆者。尤其一開始要替小狗改名，就花咗唔少時間。玩家需要讀出小狗名字，不過最好改一啲音節較短，較好辨認嘅名字，例如Lucky，因為要讀幾次直至小狗能辨識及記住名字為止，好花時間。最嘔血係玩玩吓小狗竟然會忘記自己個名，於是又要再一次進行辨聲，還要認成十幾次先得！再來教曉小狗動作都要用聲音教授，所以玩家處身環境最好較靜才好認聲。實地測試過後，發覺小狗所有動作指令，其實都可以廣東話教授，即係「手手」、「坐」都識聽，只要錄音時清清楚楚就得喇。至於二人通訊玩法方面，除咗交換雙方小狗資料外，重可一齊玩吓飛碟等小玩意，不過就唔可以比賽喇。
靚女試玩《任天狗》
今日嘅ImageGirlKennis，本身都係一名愛狗之人，自己有隻活潑可愛嘅松鼠狗，雖然唔係忠實機迷，不過對《任天狗》特別有興趣，尤其畫面真實，可以享受到養狗樂趣，同時又唔使自己處理「臭臭」！最過癮係遊戲內小狗都好易教，比養真狗更有成功感。
售賣點：DreamStore（25753285）
地址：灣仔東方188商場256號舖
