今年三十二歲嘅日本搞笑女藝人青木沙也加雖然生得唔算靚女，但近日憑住一把臭口以及出位舉動成功上位，佢早前為日本朝日電視台節目《LondonHearts》拍攝咗半裸寫真集《Ouvoyez-vous?》，寫真集嘅拍攝片段喺上周二嘅節目內播出後，竟然以勁高收視大勝對台所播嘅棒球賽，而寫真集初版二萬本更加喺短短五日賣斷市。
青木為呢本寫真集完全拋開搞笑藝人形象，拍封面相時以單手掩胸上陣，而內頁相更加豪放，僅以一大抽頸飾做遮掩，露出南半球以及肚腩，不過最出位都算係着咗件魚網襪質料嘅連身衣，佢重大膽話要挑戰宮澤里惠經典全裸寫真集嘅地位㖭！
前日，青木就同《LondonHearts》嘅主持人田村淳以及田村亮齊齊出席寫真集嘅握手會，吸引咗八百幾名fans參加，而現場預備好嘅五百本寫真集亦喺半個鐘內賣清，非常厲害。當日青木身穿浴衣現身，一見到fans即時發揮佢嘅臭口本色，話買佢本寫真集嘅人正一蠢材。不過眼見處女寫真集大賣，青木食住條水路，揚言下一次會露乳暈喎。