卡斯辛奴最近將佢喺羅馬間屋放盤，令人聯想佢季尾離開羅馬嘅成數確係幾高。意大利傳媒指，查實呢個壞孩子好可能投祖雲達斯，問題係佢母親唔捨得羅馬呢個地方。卡斯辛奴左右為難，即管睇佢為自己前途着想抑或做孝子？
卡斯辛奴爸爸當年拋妻棄子，喺單親家庭長大嘅佢，最錫自然係綿乾絮濕湊大自己嘅媽媽。據講，卡斯辛奴嘅媽媽唔止鍾意羅馬呢個地方，又係羅馬球隊嘅忠實fans；所以卡斯辛奴每次講自己想離開羅馬，都搞到阿伯母喊到滿臉淚痕，好淒涼嗰隻。
羅馬會方早排宣布來季會開水喉買人，但原來想斟嘅球員，最出名都係利物浦嘅希比亞，條水喉唔慌開得大，卡斯辛奴想大展拳腳真係早走早着；至於佢能否勸服阿伯母愈住愈北，由巴里到羅馬，再到都靈，就睇卡斯辛奴牙力囉。
小奧尼爾唔識死
奧尼爾同小奧尼爾喺噚日熱火贏溜馬場波交手，啱啱復出嘅小奧係上半場唔知有意定係無心用膝頭哥撞傷大奧嘅大腿，令到後者要退下火線，聽講剩低兩場常規賽都唔使打；其實兩隊嘅季後賽種籽排名都唔會點變，大家實在唔使咁搏，唔係喺呢個階段再受傷咪重衰，尤其小奧剛傷癒歸隊，重要硬拼大奧，真係佩服佢心口寫咗個勇字囉！
國米「凶地」走向平和
聖西路球場經過歐冠盃嘅「煙花事件」之後，周日國米對卡利亞里嘅聯賽重返「兇案現場」。賽前警方做足預防措施，當晚可容納八萬人嘅球場唔見咗一半球迷，我求大俠認為球迷好可能係嫌賽前要搜身麻煩，同擔心會出事而唔入場啫！而場波進行期間，國米球迷拉開「不要暴力！」嘅橫額。文仙尼贏波之餘見到球迷生性咗，一定開心番晒喇！
李察臣返紅魔大想頭
西布朗借將李察臣，喺護級如火如荼之際，表態無興趣留低係西布朗，誓要重返紅魔，爭番個正選位置，目標直指傑斯嘅左中場，皆因傑斯同曼聯續約仍未傾妥，李察臣覺得有機會爭到正選位置。我求大俠唔係潑冷水，就算傑斯唔續約，費Sir多數會搵好似蘇拉利呢類援兵，李察臣心態係啱，但睇睇彭拿治、賓利、柏加呢類例子就知。