中小型酒樓結業，在近數年頻密得令人麻木，但海洋皇宮大酒樓就不同。聽到這個壞消息，心情就好像當年聽到利舞台要被拆卸一樣，講一句深表遺憾。在網絡搜尋器Click入「海洋皇宮」這個名，隨即出現一大串香港各大商會、社團的連結，可見在香港呢個寸金尺土的地方，逾四萬多平方呎、有大禮堂、夜總會及多間宴會廳、可筵開218圍酒席的地方真係絕無僅有。嚟呢度登台的藝人多不勝數，連哥哥、阿梅都曾踏過海洋皇宮的靚舞台，家燕姐過往擺生日壽宴都會嚟呢度，30年來睇住佢由少女變師奶。昨天4月17日結業前夕，老茶客們都趕來會會老朋友，各有各Say。
記者：邵超 攝影：林栢鈞
JoeJunior（歌星）：皇宮台形靚
「咁大個場真係愈嚟愈少，我曾經喺呢度做過一年駐場歌星。海洋皇宮最大特色就係台形靚，舞台伸出伸入好先進，燈光好襯。」
呂珊（歌星）：期待下一個約會
「七十年代尾已經喺度唱，爹哋、媽咪生日會喺度包廳食飯。聽到執笠好唔開心，中式夜總會無晒，其他地方冇咁好Feel！開新店時，都會去幫襯。」
謝生（二十年老茶客）：「自由行」累加租
「呢度嘅點心，水準好好，地點好方便，好多時一班老朋友同啲後生喺度聚埋。執笠梗唔捨得，業主連加租三成都唔制，最衰『自由行』！」
麥小姐（五年新茶客）：給老員工送枝花
「呢度嘅員工服務熱誠，好多都六、七十歲，所以好Treasure份工，對客人細心又熱情。呢度成日有新Menu，一定要讚！今日特登嚟探公公、婆婆，送枝花鼓勵吓佢哋。」
譚小姐（阿姐）：難捨好姊妹
「失業當然擔心，喺呢度由幫工做到長工，都做咗十幾年。識咗一班好姊妹，同茶客咁耐感情，真係好唔捨得！」
