自從副手陳德霖「突然」宣布將於五月離開金管局後，任志剛一直避見傳媒，到噚日先以主講嘉賓身份，現身「凱洛格（Kellogg）-科大」嘅行政人員工商管理碩士（EMBA）第七屆畢業典禮，大家自然唔會放過佢。
噚日嘅典禮場上，除咗五十位畢業生外，重有好多大人細路同BB觀禮，任總喺演講時談到，香港𠵱家最重要係點樣保住國際金融中心嘅地位，人才好重要，佢就啱啱流失咗一個，諸君自然意會到佢講緊邊個啦。之不過班細路同BB就一啲都收唔到，重有幾個小可愛又叫又喊同任總「搞對抗」，任總大聲啲，佢哋又大聲啲，都幾搞笑。之不過，噚日對在場人士而言係歡樂日子，冇所謂啦。
禮成後，任總只係畀大家問三個問題；至於陳德霖繼任人選安排嘅答案全無新意，「外滙基金諮詢委員會轄下嘅管治委員會短期內會開會討論，然後通知財政司司長，時間唔會太耐嘅，希望可以好快決定到。」睇嚟佢條氣重未順番。
傳真︰2623-9278
電郵︰[email protected]