內地嘅反日情緒高漲，唔單止聲稱要罷買日貨，甚至過晒火位到處破壞，見日本品牌就打，亂晒大籠。香港人好彩冇俾內地同胞影響，遊行重係好理性和平，亦都唔會逢日必反。但係點都好，「日本」呢排都係好敏感嘅字眼，好似民建聯嘅蔡菜子咁，八方一問佢係咪揸日本車，佢即刻哈哈笑，叫八方「唔好講呢啲啦！」八方睇過資料相，發現蔡菜子揸嘅係日本凌志（除非佢阿姐最近換咗車），怪唔之得費事講啦。
富貴黨揸歐洲靚車
香港人其實好遵從鄧公嘅教導，唔理係日本車定係歐洲車，總之係好車就揸得，所以揸日本車係不分黨派，陳智思同蔡菜子一樣，都係凌志嘅擁躉，鄭家富同李卓人就揸Toyota（豐田）。
當然好似田少呢啲富貴議員，一定嫌日本車cheap，田少同周梁都揸架波子，田少重有架靚Bentley。詹培忠有名畀你叫金勞，梗係坐RollsRoyce。民主黨最有錢嘅李柱銘就揸Jaguar。
八方問李卓人，呢幾日會唔會盡量唔揸Toyota？人哥就話，𠵱家其實好難搵到真正嘅日貨，因為生產全球化，好多日本牌子其實都係其他地方生產，「我都唔知我架Toyota喺邊度做。」佢重加句話，總之一定要搞清楚，我哋反對嘅係日本軍國主義、反對日本入常、反對日本篡改教科書，唔係要反對日本人同反對日本文化。
冇揸車嘅張文光就話，總之反日唔好上綱上線，買乜電器、睇日本書、睇日本電影同反日係冇關係，日本文化係有可取嘅一面，唔應該一律罷買日貨。
不過另一個仁哥有唔同style，可能因為多年搞保釣，何俊仁喺情感上都有意識避用日貨，佢話，一時間都講唔到屋企所有電器係乜牌，但可以嘅話佢盡量唔用日貨，好似佢架車就係法國雷諾；音響用飛利浦唔買Sony；DVD機就用國貨「步步高」。八方唔係暗示仁哥睇翻版，不過，係人都知用祖國DVD機，乜碟都睇到，靚機反而唔掂。
據何俊仁分析，罷買日貨唔係唔可行，但一定要有組織，甚至要由政府帶頭做，千祈唔好殺錯良民。例如話，可以針對個別支持戰爭、支持扶桑社篡改教科書嘅日本企業而罷買，總之要令日本公民同社會都緊張，咁嘅罷買先至有效果。
聽完仁哥一席話，八方都自我檢討一番，八方家中有兩部車，一部係萬事得，好彩一部係福士；至於雪櫃電視機飯煲同熱水煲就一律日本貨，幸好洗衣機買咗惠而普冇用愛妻號，手機用開Nokia，否則全家大件電器都係日貨，好羞家。而為咗增加愛國心，日前家中換瓦煲，八方都毅然用國貨，唔買日本瓦煲，算係對日貨一種抗議，當然都希望個中國煲爭氣啲，唔好咁快玩完啦。
傳真︰2623-9278
電郵︰[email protected]