愛斯賓奴擒晚○比○打和馬體會，該隊喀麥隆門將卡文尼居功至偉，佢響下半場先撲出F托利斯嘅十二碼，再響完場前單手托出對方一個必入頭槌，做咗買馬體會熱W者嘅剋星。
卡文尼原來大有來頭，佢響二千年悉尼奧運足球助喀麥隆首度奪金。之後又參加○二世界盃決賽周，更被譽為干奴同貝爾後非洲最出色門將；今季更傳阿仙奴等大球會想買佢㖭！
卡文尼表現出色，但場波卻有「污點」，上半場響小禁區入邊嘅卡文尼，就畀球迷掟出嚟隻蕉掟中（嘲諷佢係黑猩猩）。其實西班牙球場種族歧視問題一直存在，唔知當局會唔會效法意大利最近嘅新條列，禁止帶煙花等物品入場呢？咁以後西班牙球迷咪連蕉呢類生果都唔帶得入場？
講番意大利新條例，擒晚警察響羅馬對里賈納賽前沒收大量刀、棍同標語，又派直升機響上空監視；而低級組別有兩場聯賽被取消，原因係球場保安達唔到要求；但唔知意大利可以維持幾耐！
博軍點會抵制日貨
國內近排日日有人叫喊要抵制日貨，但有人反問：乜可以唔用日貨咩？意甲球會博洛尼亞就用行動證明唔得，事關該會一早鎖定幾個年輕日本球員，日前重派球探去日本睇辦。鬼咩！日本仔波底好，又平又捱得，加埋商業價值高，十足日本電器咁平靚正，鬼佬有乜理由唔流晒口水啊？
指定信用卡慳手續費
球迷想買世盃決賽周門票，可以用信用卡付款，但球迷就要留意，如果唔係用世盃指定贊助商信用卡，就要收手續費，高達門票嘅六成，都咪話唔驚人；有球迷就投訴呢種做法，歐盟有關組織亦調查有冇涉及不公平。我求大俠覺得好難話邊個啱，只好喺度提醒想買波飛球迷多多留意！
約基捨卡塔爾投效
伯明翰前鋒約基宣布加盟悉尼FC，離開打滾多年喺英格蘭球壇。悉尼FC無講簽約基嘅條件，但令到這位千里達國腳婉拒卡塔爾，嗰邊出手唔慌低。其實A-league最近廣納外援，連國貨曲聖卿都獲阿德萊德垂青。澳洲加入亞洲足協，遲早會碰中國，曲聖卿做硬研究對象嘞。
姚明多得華人撐場
中國籃球明星姚明部新戲《姚之年》早兩日喺美國侯斯頓公映，票房就唔掂，走訪嘅記者話上周五晚戲院只得幾十人入場，入座率唔夠一成，且大部份係華人帶住仔女嚟捧場。不過姚明都唔使心傷，畢竟佢係靠球技搵食，唔係要投身演藝界，而且喺美國巿場當然蝕底啲啦！