數碼影音︰Nikon潛望式卡片DCS1追住塊面影

𠵱家啲卡片式DC真係多如天上繁星，求其走入間AV舖，就好似見到一家大細咁，因為部部都好似咁上下樣！而最新加入「卡片家族」的，就有首次推出卡片式DC嘅NikonS1，玩超薄不特止，重有日本方面稱為「顏認識」嘅自動追蹤面部對焦系統，最啱幫女朋友影相時用，唔使驚影完出嚟成塊面矇晒，俾人詐型！

記者、攝影：劉耀祥　ImageGirl：小慧

潮流大勢所趨，DC最好有咁薄得咁薄，成功例子者有CASIO嘅Z系列及SONY嘅T系列。日前Nikon亦終於都要出手，推出卡片式DCCOOLPIXS1。日本方面早兩日先正式賣街，話咁快就有小量水貨空運到港，暫時只有白色機身。價錢方面亦都唔算貴，開價都係$2,680，想入貨？不妨等多兩日，因為大貨今個星期中就會到，重會返埋其餘兩隻顏色，即係黑色同銀色！

Profile

感光元件：536萬像素CCD（1/2.5吋）
顯示器：2.5吋/11萬色
變焦：3倍光學/4倍數碼
記憶儲存：SD
電池：專用鋰電池
體積：89.9×57.5×19.7mm
重量：118g
售買點：DCPower（23846698）
旺角山東街47-51號星際城市2樓201號舖

$2,680

自動追蹤人面

要喺芸芸卡片式DC中脫穎而出，除咗外形要省鏡，玩意重要夠多！內置有16種場景之外，Nikon更為S1加入「顏認識」系統，即係話影人像時，焦點會不斷追蹤主體面部，確保閣下嘅「顏面」清晰可見！實際試玩中，反應的確唔錯，就算Fing緊頭都可以不斷自動追住塊面嚟對焦。而且S1亦相當聰明，如果圖中並冇「顏面」，就識得自己唞一唞，唔會周圍Zoom來Zoom去搵餐飽，幫到手慳番唔少電㗎！「顏認識」之外，S1重有個名為D-Lighting嘅智能白平衡系統，可以將相片中較暗嘅地方變番光，平時影相可能唔覺有乜用，不過當遇上大背光，影咗個黑面神出嚟，嗰陣就真係「多得佢唔少」！

■自動面部追蹤對焦會有框框不斷向人面對焦，非常好玩！

■只要喺人物場景中，就可以啟動「顏認識」功能！

■內置16種場景，身處任何場合都總有一款啱用。

對焦失準唔會Save

作為卡片式DC初哥嘅Nikon，S1機身質感非常出色，雖然影相當日只有白色機身，不過一樣好有睇頭！細心望多兩眼，就會發覺白色當中加入閃粉，令機身特別「令」！Nikon首次採用潛望式鏡頭，令機身厚度只有19.7mm，雖然唔係話超薄，但係筆者覺得有番少少厚度，揸上手重實在！鏡頭實用性非常唔錯，尤其玩微距就最正，最近可以離主體4cm拍攝。但係最過癮者，就係S1於拍攝微距時，可以自動偵測有冇手震，如果真係手震，就會問咗你先至Save，真係好鬼聰明！
再反轉個機背睇睇，用上2.5吋大芒，似乎係順應潮流之作，再開機睇睇，就會發覺顏色好實在，兼且有埋繁體中文介面，的確絕非「應酬」之作！不過由於芒大關係，所有按鈕搬去右邊之餘，Size都要的的骰骰，手指較粗者，就辛苦少少喇！