呢輪中日關係緊張，作為中國人，八方都好關心，特別係怕偉大祖國玩大咗，失控就後患無窮，日本人亂咁篡改教科書一定唔啱，但係中國人都唔可以亂嚟，給人口實，倒退至出義和團嘅年代，咁樣中國人就好可悲。
八方問曾經留學日本三年，喺慶應大學法學部取得碩士銜嘅有線女主播張宏艷有乜感受？佢話今次事件好傷害兩國人民嘅感情，佢亦為派駐北京嘅日本朋友安危感到擔憂。
由於日文了得，佢呢輪放假都要隨時候命，好似噚日咁，電視台一收到中國外長同日本外相會面嘅片段就即時放出街，真係考牌，好彩佢話町村信孝嘅日文唔難聽，佢唔使等女傳譯員開口就已經繙譯成廣東話版本，真係醒；反而李肇星講得太細聲，佢要等日文繙譯先知佢講緊乜。
傳真︰2623-9278
電郵︰[email protected]