噚日八方講過，工商及科技局局長曾俊華帶同手下一班女將，一齊忙於準備年底於香港舉行嘅世貿（WTO）第六次部長級會議。到底佢哋有幾忙？話說其中一位女高官、工業貿易署副署長葉文娟（圖）有個美滿家庭，但最近四圍飛冇時停，搞到一次返屋企，連仔仔都差啲唔認得阿媽！
講番呢次部長級會議，好多嘢未拍板，曾俊華重要出多幾次埠先掂，因為上次嘅坎昆回合全冇成果。八方都希望呢次世貿部長級會議可以取得成果，咁香港人使兩億幾主辦都物有所值，否則二萬幾人嚟晒，得個講字就好浪費，重中咗口卦，俾人叫做WorldTalkOrganization。
傳真︰2623-9278
電郵︰[email protected]