港股上周表現真係好反覆，本身個勢可算幾強，但就受外圍大跌市拖累，上周三大幅回升後，上周五又再大跌；家吓睇外圍，本周初肯定要試一試低位支持。
大半個月來，恒指由13357反彈，到上周三的高位13808，回升450多點後，由於未能確認升破50日線（13790），結果又再掉頭回落。上周中講過，未來的一兩個禮拜，大市會再試低位支持，由於調整時間已足夠（由去年12月初開始已4個多月），今次回落，可趁機會入市，迎接下一個升浪。
上周推介嘅股票，整體表現都幾硬淨，其中尤以慶鈴（1122）同聯洲國際（048）要特別留意。慶鈴在上周中升上1.63元的高位後，出現整固，高位自然引發大量獲利貨沽出，但大行買盤仍鍥而不捨，頂得住有餘，個勢咁勁，話冇料到，冇可能。
不過，慶鈴將於本周三（20日）宣布末期業績，講到業績，千祈唔好有任何期望，可能宣布後，股價會「挫一挫」，但呢個就係最佳入貨機會，畢竟慶鈴過去兩個多月的大升浪，本身應該係有大動作醞釀中，唔排除日後會重組同轉型。
至於聯洲，上周五收1.86元，重係企喺大半個月來的高位水平，好明顯係基金同大行在護航，短期唔排除會受大市跌勢影響而走軟，但幅度唔會太大，若整固後再上，升破1.86元阻力，短期目標指向2.10元，中線以長達半年的大圓底衡量，上升目標係2.50元。
聯洲PE相比國際同業，確實係低得好吸引。05年度（5月年結）預測盈利1.82億元，每股盈利15.1仙，預測PE12.2倍，而國際同業則由16至27倍不等。未來兩年，聯洲盈利重會有高增長。
早輪推介過益安國際（082），近一個月來，股價在低位已形成一個小圓底，上周四大陽燭回升，上周五整固，若再升破0.88元阻力，新升浪即可確認，初步可重上1.0元水平。
益安現正安排做「披成」，市場估計「披成」價係1元，將需發售8億股，令總股數上升到20.2億股。市價1元計，06年PE5.6倍；若股價上升到1.20元，PE亦僅6.7倍，比現時同業更具吸引力。
郭兆誠