好耐冇見嘅潮界經紀大隻標，只見佢非常忙碌，難得佢仍保持一身型人裝扮，行為舉止仍非常優雅，大隻標話：「四月份潮界最爆莫過於鬼佬車保羅隻尖頭未來人公仔，因為同時有幾款尖頭產品推出，不過由唔同牌子製造。其中日本間『麥記』玩具最識得食住條水，出完尖頭公仔又出尖頭咕𠱸，聽講重陸續有嚟。
「今個月打頭炮推出隻名為『疏乎怪物』公仔擺設，產量係歷年之冠，唔再係超限量品，非常易買到，搞到車保羅啲作品周街都係，好冇癮啫！麥記原來好蠱惑，由間音樂公司買尖頭未來人版權返嚟，以車保羅之前做落嘅音樂封套為藍本，唔使點分版權費畀原作者，佢亦冇權參與製作。唔知係咪車保羅唔忍心見到自己嘅創作被人亂舞，所以聯絡番自己班美國Friend推出另一款尖頭人公仔，趕喺今個月推出，才攞番個彩，亦造成車保羅打車保羅局面，認真厲害！
「話時話，全因呢個尖頭公仔，佢由一位單車速遞員成為近年最熱街頭藝術家之一，由唱片封套、書、海報、公仔，個人簽名都大賣，神話嚟㗎！」
主持人：大食Jack
八卦熱報：[email protected]