煲呔未坐正，就已經是非多多，班土共唔忿氣，班太子黨又睇唔過眼，但係阿爺心有所屬，邊個都冇符。
阿爺呢鋪一定係悉心部署，因為連政務司司長都幫煲呔揀埋。肥佬許就周街同人講佢係阿爺欽點嘅，重講到似層層咁，話上次北京搵佢做財政司司長，佢推咗，今次阿爺又搵佢做政務司司長，佢唔好意思再推，所以就捱義氣，做兩年一人之下嘅問責高官。
又真係難為咗許老爺，佢本來已經退下火線，等住接夏佳理嘅棒做馬會主席，但係𠵱家就可能計劃有變。
有老許之友問佢，重返官場後會唔會入住政務司司長位於白加道官邸？佢嘅答案話唔會，不過，最後會唔會搬，冇人講得準。
傳真︰2623-9278
電郵︰[email protected]