單睇上周五美股咁跌法，睇嚟今日港股都唔慌好得去邊，小初都係小心為上，睇吓稍後有冇平貨執。
雖然外圍唔就，但經紀陳話收到料，好多炒家仍對澳門賭業股有一定憧憬，會繼續部署等嘉華國際（173）同嘉華建材（027）復牌後大炒一轉，因為有消息話兩股會在本周復牌。
呢班炒家諗法啱唔啱，小初真係唔敢講，皆因有時真係炒股唔炒市，股票升跌未必同大市同步。
濠賭股中有一隻今日復牌，就係豊采多媒體（764），隻股曾經話想沾手賭業，其後一度又話唔玩，但收尾原來又搞番，但與一般濠賭股唔同，今次佢唔係買澳門酒店連賭場，而係投資一隻賭船內嘅賭場。
經紀陳話，由於豊采街外貨源唔多，而大股東中國星（326）早排又增持過，按理要炒上應該唔難，但最怕係人哋見股價高企，可能順便搞埋集資。
豊采自上個月底已經停牌，停牌前收報0.35元。
慕容小初