想當年卡片機NECN900嚟到香港，真係不知幾咁有型，基仔成日都希望可以掛喺個心口！終於皇天不負有心人，等咗差唔多成年，NECN900個價終於都勁跌到千零蚊就有得玩。雖然N900規格唔算高，藍芽又冇，重要連住個Handsfree先講到電話。不過以8.6mm機身厚度，重有30萬像素鏡頭影吓相，基仔都覺得好抵玩。據聞由於跌價關係，好多舖都去貨去得好快，搞到竟然出現斷市，有心買嘅，就真係要行多幾間！
索記Z8005月殺到
相信冇乜邊幾部機，水貨賣咗成三幾個月，依然密密去貨！講緊嘅就係索記V802，3G功能加上有繁體中文，外形又夠靚仔，最重要就係行貨唔知幾時有。不過基仔日前就收到風，話V802行貨版Z800應該5月就會殺到嚟香港，都係由某大3G網絡商提供，而且價錢都好似好抵玩，應該喺$4,000樓下。睇番𠵱家水貨都只係做緊約$3,500，行貨都係多幾百蚊，最重要唔使擔心保養嘅問題，值得等多佢一個月！
摩記MPx唔出中文版?
近期間間大廠都話出「薯麥風」，尤其睇見O2mini咁成功，就更加搞到個個雄心壯志。例如摩記出完一系列太極之後，又有部MPx220，不過大家唔知重記唔記得，摩記重有部「反芒王」MPx？年初都有水貨嚟過香港，基仔都拎過上手玩過，可以又直又橫咁揭開的確幾過癮，之但係當時只係英文版，唔少人都等緊中文版嘅出現。可惜近期就有消息流傳，會取消推出中文版，對於基仔呢啲中文用家，都係一個壞消息。唔通摩記覺得MPx唔啱中國人手形，所以唔出中文版？
