上周五，紐約油價雖然繼續回落，但美國經濟前景唔得明朗，IBM、埃克森、惠普等重磅股散8.3%至4.2%，杜指報銷191點。外圍如此，港股暫時處於捱打局面，上周恒指13630，估計最壞打算考驗13360/13400。未來幾日，會係P輪天下。
中移動P輪3655：中移動（941）去年盤數雖然獲得芬佬收貨，但近期股價仍處相對高位，大市氣氛唔妥，中移動亦難守穩高位，短線炒中移動P輪。
主角係3655，7月初夠鐘，輪價15仙，溢價3.7%，槓桿率17.3倍（有效10.6倍），引伸波幅20.9%。遠期P輪4762，對正股變化嘅反應比較細，隻輪11月尾到期，輪價19.6仙，溢價8.6%，槓桿率13.2倍（有效6倍），引伸波幅25.1%。
長實P輪3542：長實（001）現價72元，較上月尾低位仍高出4元，估計會有較大沽壓。短炒長實P輪，揀3542。
3542喺7月初夠鐘，輪價17.1仙，溢價7.9%，槓桿率42.1倍（有效13.7倍），引伸波幅22.9%。其次波動冇咁大嘅，則係3697。
中石油P輪4711：油價似乎轉勢，短線搵石油P輪炒，有搵錢機會。只不過，3大石油股只有中石油有P輪，冇幾多隻可以揀，當中勉強睇得上眼嘅惟4711而已。隻輪9月尾到期，輪價20.1仙，溢價10.4%，槓桿率23.9倍（有效9.7倍），引伸波幅21.2%。
中信C輪4483：中信泰富（267）上周收23.20元，吼住回到22.50元以下時，低位博C輪4483。
隻輪喺10月中到期，輪價20.9仙，溢價負1%，槓桿率11.1倍（有效8%），引伸波幅19.4%。
章盛