樓市穩步向上，市民重燃置業興趣，新界重有供平過租，吸引唔少人加入買樓行列。
祥益董事謝澤銘話，屯門與天水圍，好多投資者惟有減租招徠，好似天水圍嘉湖山莊三期四座低層C，業主原本叫租四千八，想快啲租出，於是減價五百，好快就租得出。新屯門中心五座高層H，七百五十呎，減收三百，以四千七租出。
佢話，本月成交租務，九成半業主降低租金叫價，一般減一百至三百，平均減六點六巴仙。兩區單位月租三千到五千。因為業主肯降低租金叫價，刺激租務成交增加，比上月同期多一成。
不過，各位業主又唔使咁悲觀，因為當供平過租嘅放盤進一步減少，部份市民又會轉番去租樓，到時租金就有望回升。
地產代理對於各大樓盤都相當熟悉，樓市轉旺，佢哋都會入市買番間。噚日正式開售嘅尖沙嘴凱旋門，都有代理買嚟自住。
好似利嘉閣區域董事趙保杰，就買咗間摩天閣一座中高層三房單位自用，單位一千一百方呎，呎價成萬蚊。
代理其實都係普通消費者，買樓都唔一定用嚟炒作，不過，蘭西聽講，新地賣畀代理嘅凱旋門單位，原來附有條件，就係一年之內唔准轉賣。
講開凱旋門，噚日喺國金一期賣樓，黃昏叫齊記者做發布，寫字樓大堂突然停電，烏燈黑火，扶手電梯都停埋，要十幾分鐘先至回復正常。國金有咁多大機構，停電影響真係可大可小。
澳門首季有四千二百宗住宅買賣，比舊年同期增三成半，樓價升一成半。中原澳門執董郭朝隆話，次季有四至五個大盤開，共千二伙，預期大市成交可維持首季水平，造價再升一成至一成半。
佢話，首季四成半買家係換樓客，一成半上車，投資者佔四成，市況健康。放盤業主，澳門人佔九成三，港人有半成。買家以澳門人居多，達七成二，港客為一成九。
講番中原澳門，首季促成四百八十二宗成交，金額九百三十幾萬，上周筵開二十席慶祝。
另外，美聯澳門部董事楊朗明話，集團上月有十名前線個人營業額逾十萬，最高係寶龍分行陳鴻聲嘅二十五萬。美聯澳門部行政總裁張一輝頒授獎章畀佢哋。美記澳門總行今日搞開幕儀式。
韓劇《大長今》熱潮停不了，各大商場搞宣傳活動，都請嚟劇中人大小長今造勢，吸引消費者。
估唔到呢股「長今熱」，重吹到慈善活動㖭。
長實協助公益金籌募經費，即將舉辦嘅藝術創作活動「長江童心磚心公益心」，今日同公益金一齊開記者招待會，介紹詳情。席間，會有「小長今」趙貞恩做特別嘉賓。
長實集團識得點至可以攞到最大嘅曝光率，但唔知到時候，傳媒嘅注意力，會唔會去晒「小長今」度呢？
發展商請傳媒食飯好普通，請業主食飯就比較少有。第一，層樓都賣咗冇乜必要再見，就算發展商咁客氣，香港啲人忙，都未必得閒賞面。不過，上個禮拜六蘭西就掹業主衫尾，去食咗發展商一餐。
話說中山雅居樂花園班老細，包咗九龍灣展貿中心個廳，筵開近百席，請友好同業主食番餐，重請埋合唱團舞蹈團助興，又有許志安、向海嵐唱歌，重有獎抽㖭，加上九展啲餸又遠比預期好，所以大班人都食得好開心。
聽啲業主講，個盤管理得好好，三千呎頂層複式無敵全高爾夫球場景單位，都係二百萬，退咗休整番間，何必喺香港買三萬蚊呎「豪宅」同人癲。
電郵地址：[email protected]
