神經質兼有不良嗜好嘅女藝人喺圈中有唔少男友，佢重好鍾意一腳踏兩船，而且幾乎次次都俾人拆穿，不過有一單就冇乜人知嘅，原來佢三年前同過一個唱片監製搞埋，當時佢啱啱搭上叛逆少年，雖然傳得好厲害，但唱片監製竟然奮不顧身咁沉迷落去，最慘係佢自己有老婆仔女，佢本來冇不良嗜好，最後都跟埋女藝人學識隊草啪丸，結果搞到妻離子散，冇幾耐女藝人情投叛逆少年，一腳踢開個監製。
唱片監製感情上受到沉重打擊，又因唱片市道低迷，𠵱家生活十分潦倒。有句說話係「上帝要其滅亡，必先讓其瘋狂」，用嚟形容女藝人啲男人好貼切，因為個個男人愛上佢時，都好似着魔咁，但下場就好悲慘。
YSL噚晚喺台北舉辦2005年春夏服裝發表會，蘇有朋同台灣藝人李倩蓉一同合照，一個黃色一個綠色，十分搶眼。
蘇有朋話所穿着嘅YSL外套約一萬多港元，恤衫也要二千多元，長褲接近四千元，全身打扮大概二萬元。
馬景濤日前喺台灣襲警，被起訴妨害公務罪同傷害罪，佢原定噚日要到北京同瀋陽宣傳新劇《太祖秘史》，之後再到廣州宣傳《魔界》。為避開傳媒，馬景濤噚日突取消去北京嘅機票，連佢喺內地嘅助手Timmy都話唔知行程有變，Timmy話：「他向來獨來獨往，班機的事情都自己安排。」而馬景濤經理人夏玉順今日會由日本飛往北京，重強調馬景濤會如期出席活動！
男子組合E-kids嘅Tommy同Alan噚日到九龍城行時裝騷，今次係E-kids第一次行catwalk，雖然只係需要着一套衫，但佢哋行catwalk時都烏龍百出，成員Tommy嘅衫因為有少少透視，搞到佢行嗰陣時成日驚會凸點，重搞笑地用雙手遮掩胸前，佢同馮仁昭講因為怕醜，事前重問助手要唔要貼乳貼喎。
徐若瑄（Vivian）噚日喺台北舉行「好事魔力嘉年華」活動，佢身穿黑色露臍運動裝，露出雪白嘅肚皮，大益歌迷。
而為咗擁有平坦嘅小腹，Vivian除咗勤上健身房同游水外，重每日做一百二十下situp，原來要保持美好身段，真係要付出代價㗎。
