今年二十一歲嘅日本水着女星小倉優子，以天真可愛形象勁受日本少男歡迎，就連日本人氣樂隊ORANGERANGE成員都自爆係小倉fans。小倉亦趁住人氣當旺密密推出DVD同寫真集搶錢，喺上星期五同日一口氣推出兩隻DVD。不過，為怕fans睇得多生厭，小倉喺DVD大搞新意思，以多個形象示人，令男fans眼前一亮。
向來硬銷可愛的小倉優子，喺DVD內以十幾款唔同造型現身，小倉重話今次係佢送畀fans嘅私人時裝騷。小倉除咗穿上短裙仔扮啦啦隊之外，一時又無厘頭穿上日本神社巫女服，話要同fans辟邪，轉頭佢又換上一套黑色女侍應服裝，之後又以滿身喱士短裙，手抱熊仔嘅Lolitalook示人，加上小倉含情脈脈嘅表情，重唔冧死男fans。
最後，小倉更梳起孖辮，穿上粉紅色體操服勁擘一字馬，當然DVD內亦不乏fans最愛的例牌水着。而為咗新DVD，小倉亦喺上周六舉行握手會，同fans近距離接觸。