星期一本欄講《糖尿》，讀者反應熱烈，老友記電話、讀者電郵，都收到唔少，連自然治療法專家披圖梁都寫咗傳真過嚟。BeeGees嘅RobinGibb喺六月十一日來港開演唱會，聽講反應熱烈會加開六月十號一場，與十多人樂隊及三十人組成嘅管弦樂團合作演出。披圖與BeeGees素來老友鬼鬼，相信佢呢排會好興奮，期待RobinGibb到臨，早買定飛，點知佢睇完篇《糖尿》，更立即傳來便條賜教，真係唔話得。
披圖講，「糖尿病係胰臟損壞了，不能有效地生產胰島素，把碳水化合物（如糖、澱粉質）分解。損壞原因是「漏腸」，即大腸內的毒素、細菌、寄生蟲等滲出，若脾臟中毒即免疫系統失調，若胰臟中毒即有糖尿或尿酸過高（痛風、或對蝦蟹等食物敏感）。」
咁專門，留番啲專家去診斷治理，左丁山只係略有常識啫，有事一定去請教專家。《糖尿》一文，講及飲苦瓜（涼瓜）乾煲水，廣告Ｗ有反應：「喂，我飲咗三日，腳步浮浮，睇中醫，話我係寒底，唔適宜飲苦瓜水噃。」大編輯亦有類似感覺，總之體質各人唔同，飲咗冇事嘅，可以繼續飲，飲咗而覺得太過寒涼嘅，立即叫停！
建築邦來電：「我在中環Ｂ記買過越南苦瓜乾，一包內有好多蟲，我睇唔到，收埋幾個禮拜之後拎出嚟，膠盒內嘅苦瓜乾竟然俾蟲食晒，嚇死我。買苦瓜乾要睇清楚，搵燈照一照，見冇蟲至好買，煲水前要沖洗乾淨。」建築邦真好運，有蟲嘅苦瓜乾都俾佢買到，六合彩就唔見佢中！
好多讀者問Ｅ記、Ｂ記喺邊度，已分別用電郵答覆，香港有好多信譽卓著嘅舖頭，適逢左丁山在中環行走，幫襯開呢兩間比較多啲貴價貨嘅舖頭而已，讀者未必需要照跟。