家陣拍拖節目無嚟新意，來來去去唔係行街睇戲就唱K，計我話應該趁假日衝出市區，接近吓大自然，而閒情呢家嘢都係製造出嚟嘅啫！今日短線遊唔係帶你去荒山野嶺賞月，而算係近近哋，去大尾篤附近的汀角泥灘睇海星，夜少少就入大埔滘自然保護區觀螢火蟲，都真係幾浪漫㗎！
記者：梁彩燕 攝影：陳偉強
部份相片由「綠色廣場」提供
Models：Kelly&Man（TheGroup）
海星多面睇
大埔墟火車站乘巴士汀角站落車後，沿對面馬路小徑往海邊行15分鐘就會見到紅樹林。汀角紅樹林響1985年被漁農自然護理署評為「具特殊科學價值地點」（S.S.S.I.），呢處的紅樹林生長得相當集中，多個紅樹品種重會伸延至大尾篤，響呢度可搵到白骨壤、欖李、秋茄及海漆等濕地植物，近觀欣賞重會見到泥地上伸出一條條呼吸根的紅樹、散發淡淡幽香的桐花樹等生態。
Check清水位至出發
越過紅樹林，踏進泥灘只見海面微波粼粼、風平浪靜，焦點移番上泥灘，今趟觀「星」之旅，竅門主要靠自己細心觀察同發現，當退潮時，成三、四個足球場咁大的泥灘上，就會浮現出遍地的螺類、貝類、海葵、各種蟹仔以至海星、蜆同蠔等生物，因為四、五月氣候最宜人，灘上生物亦較多，閒閒哋可發掘到30幾種生物，不過大部份都具有保護色唔易被發現，所以記得帶多對「小心眼」同行！若想睇到海星，首要條件係水位降至0.5米以下先有機會！所以出發前記得上天文台個網Check清楚潮水漲退表，以免去到「摸門釘」就掃興啦！
海星層層叠
今次行程的重頭戲——海星，乃香港常見的飛白楓海星，由𠵱家開始至9月尾正值繁殖期，所以灘上的海星群洶湧，行兩步就可見到相互重叠正在交配的海星、又有啲因為溫度或鹽度變化而變成4足、5足、甚至6足，都幾奇景㗎！夠膽的話更可與海星來個親密接觸，但摸還摸，千祈咪帶走呀！
潮退有嘢睇
至浪漫閃閃螢光
吃過晚飯赴大埔滘自然保護區（松仔園），直上小徑走5分鐘，已見閃亮的螢火蟲一閃一閃，採訪當天季節尚早，螢火蟲未算活躍頗零星，由月尾開始時間就會啱啱好，進入佢哋交配季節，場面應該會壯觀得多。一路走，會遇到在空中漫遊的雄性螢火蟲四圍咁轉，尾部每二十秒連續地閃爍吸引異性，當附喺樹葉上的雌性接受佢嘅愛意，才會回贈一下強光以示首肯，求愛方式可比我們人類直截了當得多！而只有5天壽命的螢火蟲，最大的任務同本能就係要繁殖下一代，都可謂任重道遠囉！
沿路見樹蛙蹤迹
沿着紅、黃線至溪澗地方繼續目標為本，就可看到更多閃亮的螢火蟲成蟲，亮光遍野，浪漫極了！而初夏時分，黃昏過後沿途走重會聽到鳥類、蟬類、蛙類的大自然合奏，拿着電筒多留意樹上、路邊或河沿，亦不難發現中國壁虎、蜘蛛、樹蛙的蹤迹，絕對令你大開眼界。在此提醒大家，此保護區間唔中會有非法入境者出沒，最好約多幾Pair情侶或三五知己同行，夜遊時可多個照應。
生物面面觀
跟團去包晚膳
去泥灘同大埔滘路途唔算崎嶇，但想了解多啲生態同大自然，最好有專人講解兼帶路，費用全包夠化算。
螢火蟲、汀角趣味生態之旅
日期：A.4月24日（4月20日截止報名）
B.5月8日（5月3日截止報名）
時間：3:00pm至9:00pm
集合地點：九龍塘火車站根德道出口
費用：成人每位$158，12歲以下小童每位$148
（包括領隊費、旅遊車費、晚膳及筆記）
報名：旅行家（ http://www.hklearningbase.com/tour.asp?id=159）
查詢電話：28365878
自己去汀角泥灘
大埔墟火車站乘75K巴士（$4.7）至汀角站（邦利士多）下車。
自己去松仔園
大埔市中心乘72號巴士（$8）至雍怡雅苑下車。
