孫耀威和應采兒因為合作拍劇而傳緋聞，縱使日前應采兒的經理人公司老闆娘向太陳嵐暗示有人做宣傳，講明不會讓應采兒拍拖。但孫耀威在訪問當天提到應采兒時，卻難掩戀愛中的甜蜜神色，還頭耷耷兼面紅耳熱，似足怕醜仔。
孫耀威言談間對這段情採取保護態度，問他若真的戀愛了，是否仍拒絕公開？他說：「愛情係人生中好重要嘅嘢，我係好需要愛嘅人，無論親情、愛情、友情，我有諗過拍拖唔需要再好似以前咁偷偷摸摸，但我以前嘅女朋友係圈外人，唔想見報之後影響到佢嘅生活，我之前個女朋友喺幾個月前分開咗，係幾hurt嘅一件事，我第一次感受到要喺愛情同事業之間選擇，我揀咗事業，因為我實在冇法陪到佢。
「公開一段情，對佢有負面就唔好啦，我又未必娶到佢做老婆。如果唔係happyending咁點呢？盡量低調啲，所有嘢順其自然。」
孫耀威續稱：「我同應采兒住得好近，大家拍埋同一齣劇，多數會送埋佢返工，我哋都鍾意音樂，佢買咗CD會喺車度聽。其實佢幾似我，不拘小節，唔會斤斤計較，個人好爽，同佢做friend好開心，大家一齊都好舒服，成個劇入面，我係同佢最friend、最多嘢講，唔會因為報道而阻止到我哋做朋友。」
問孫耀威是否覺得應采兒不能讓他有信心？他說：「唔關任何人事，係自己嘅經驗，每次分手都係因為我太忙，除非我唔做呢行，又或者肯同我一齊扎根喺第二度。」
曾有報道指應采兒貪玩，加上緋聞多，不知會否因而令孫耀威信心減退？他說：「我唔覺得佢貪玩，有時成班人叫佢出嚟，佢都唔出街。緋聞嘅嘢有冇必要考究？同一個女仔一齊，佢要講自然會講，最緊要係將來，人要向前望嘅。」
