上海反日遊行愈演愈烈
張智霖禁足鄭秀文停工

日本篡改教科書中有關侵華戰爭的史實，觸發內地連串反日浪潮，昨日上海有逾十萬市民參加反日示威遊行，部份激動示威分子損毀日商招牌，甚至包圍駕駛日本汽車的內地市民。目前正在上海開工的鄭秀文受遊行影響，昨日被迫停工，而張智霖則表示會留在攝影廠內拍攝，完全不擔心安全問題。

上海昨日發生大規模反日示威大遊行，參與遊行的市民情緒十分激動，鄭秀文目前正身在上海拍攝關錦鵬執導的電影《長恨歌》，原本《長》片昨天要拍攝的一場街景戲分，亦因而臨時改在前日拍攝。關錦鵬昨日接受長途電話訪問說：「我知道今日上海有大遊行，本來部戲今日要出街拍外景，已經改喺噚日拍咗，今日要停工。」

張智霖：
坐國產車不憂安全
事實上，除了《長》片攝製隊外，李連杰亦在當地拍攝電影《霍元甲》，而張智霖、林嘉欣、馮德倫、伊能靜、繆非臨和寇鴻萍夫婿梁廷鏘等，昨日都身在上海。
張智霖（Chilam）現時在上海演出劇集《美麗新天地》，昨日他透過長途電話說：「我𠵱家喺廠度開工，呢幾日都係拍室內景，所以十分安全，我覺得上海嘅治安冇問題，我一啲都唔擔心自身安全，不過呢排日夜班咁拍，一收工就坐車返酒店休息，我都冇乜機會出街睇吓遊行完嘅情況。」
對於有乘坐日本汽車的內地人士被圍一事，Chilam回應說：「劇組安排我坐國產車，其實成件事演變到咁，我係完全理解同胞嘅反日情緒，我希望日本政府好好面對歷史，咁樣改歷史教科書，係自欺欺人嘅表現，因為𠵱家資訊咁發達，只要上網睇吓新聞已經知道天下事。」

繆非臨：
收好多抵制日貨短訊
至於近月均留在上海休息的繆非臨，昨日外出與朋友聚會時碰巧遇上遊行隊伍，她昨日在長途電話中說：「我見到好多學生參加反日遊行示威，群情都幾洶湧吓，尤其係愈近日本領事館嘅地方，都開始混亂，全部嘅車都唔可以駛入嗰啲街道，我哋搭的士經過都要落車自己行，呢幾日我嘅內地手機都不停收到好多呼籲參加遊行同抵制日貨嘅短訊。」非非表示為了避嫌，她與朋友改吃韓國菜，亦不敢以日本汽車代步。
另一方面，林嘉欣、馮德倫前晚出席在上海濱江大道舉行的芝華士派對後，目前仍留在當地。馮德倫昨日在電話中談到當地的反日浪潮時說：「我喺上海都感受唔到有太大嘅反日氣氛，因為內地冇乜報道，加上我又忙住做嘢，所以唔係咁清楚，我作為藝人對政治唔想評論咁多，但我覺得每個國家都應該面對真正史實，要公道。」

伊能靜：
塞車塞了兩個小時
導演陳可辛的電影《毋忘我》亦正在上海拍攝，該片男主角金城武是中日混血兒，在一片反日浪潮之下，問陳可辛可擔心金城武的人身安全，他在電話中說：「金城武𠵱家唔喺上海，我完全唔擔心佢嘅安全，因為佢喺台灣長大，fans一直都當佢係港台藝人，大家唔應該咁敏感。今日上海有示威遊行，我喺酒店房睇緊戲時都聽到樓下條街好嘈，雖然有反日遊行，但我相信唔會出現失控情況。」
而從日本後父姓氏的台灣女藝人伊能靜，昨日亦身在上海拍攝舞台劇，她接受電話訪問時說：「今天最大的影響是塞車塞了兩個小時。其實我會說日語，也有日本姓氏，但這是跟隨日本繼父改的，我也有自己本名，所以問題也不大。」
此外，近年不少名人到上海投資開設高級食肆，經常往返港滬兩地，其中寇鴻萍透露其夫梁廷鏘昨晚剛由上海返港，她表示不擔心餐館受示威民眾波及。寇鴻萍說：「佢話只係部份地方有事，咁我哋係中國人，做泰國菜唔係做日本餐，都唔會驚被波及。」
採訪：陳月媚、林妙萍、比華利