呢期都真係賊仔當道！繼上個星期隻《12瞞徒》後，今個星期嚟多嘢《合盜偷天》。睇牌頭！有「邦老郎」皮雅斯，都以為走唔開懶有型嘅老土悶局；本住平常心去睇，兵賊鬥智、盜寶扭橋，再加喜劇、愛情兼靚人靚景，成套戲都去得自然順暢；其實「老皮」早就應該唔做特務改行做俠盜啦，佢拍呢類片真係叫人受落好多。
記者：朱崇德
據碟場Sales報料，近排出碟都會比較淡靜，主要都係西片當道，港產新片可以話絕無僅有；除咗今日介紹呢隻《合盜偷天》外，重有隻《獅子山下》壓吓場，原汁原味香港情懷，值得捧場，而極期待嘅有剛落畫的《AV》，據知短時間內會出碟，大家得閒要勤啲巡舖！
退休大盜 墮局中局
《合盜偷天》可算是剛過去聖誕檔大片，全球票房勁收10億美元，香港本土票房都算唔錯，當時影評亦唔差！故事講世界一級鑽石雌雄大盜──皮雅斯及莎瑪希恩，突然決定金盆洗手，並到風光明媚的中美洲天堂島定居。
有如《捉智雙雄》的橋段，一直追捕他兩多年不果的聯邦密探活地夏里遜，猜測這次「退出江湖」只是煙幕，實際是計劃偷取一顆價值5億6000萬的巨鑽「拿破崙之星」，巧合地這顆鑽石竟然自己坐住郵輪去天堂島展覽。老賊見放到埋口邊嘅肥肉，手癢難耐；女賊想真退休，設法阻止；密探又拉人又要誘佢哋出山，極度矛盾！不過更估唔到呢次奪寶遊戲，內裏竟然局中有局！真係「999誰是兇手」，唔到結局都估唔到。
睇靚女 鬥演技
《合》引人之處，係佢唔似一般同類片，一味扭盜寶怪招；反而幾條情感線互相纏結，更能引出戲味！首選當然係一對賊公賊婆，皮氏今次冇擺出萬人迷嘅邦老郎形象，配上憑《筆姬別戀》而獲奧斯卡影后提名嘅莎瑪希恩超索演出，愛就愛到死、鬥氣耍花槍亦笑爆嘴，都幾有《龍鳳鬥》Feel；皮嘅演出明顯討好咗，至於莎氏就好戲之餘，全套戲出場都係三點式示人（而且愈着愈少布），真係唔知睇得佢嚟，定睇戲好！
飾聯邦密探嘅男配角活地夏里遜都有驚喜表現，活氏係邊個？話佢係《天生殺人狂》大家應該認得喇啩！上次做《性書大亨》都已經有激爆演出，今次演活跟尾狗密探，真係好爆笑，一則是同皮氏亦敵亦友嘅關係，兩個麻甩佬瞓埋一張床、又赤條條互搽太陽油，勁鬼馬；而且兩者由兵捉賊關係，變成惺惺相惜好友，如果少啲「戲」，都令人覺得做作唔自然，《合》內戲味，都係由兩人衝擊引發。
必睇Bonus
活地夏里遜爆笑結局
Bonus玩到要Disc2分拆上市，內容當然豐富！幕前幕後全記錄、導演及主角專訪及直擊片場，夾夾埋埋Making都成大半個鐘。大家留心嘅係刪剪片段，裏面原來講到雌雄大盜玩結婚，而勁搞鬼嘅活地夏里遜有另一爆笑結局！想知比原片加咗乜，自己買隻睇啦！另外，特別推介珠寶大盜專訪，被譽為世界一級珠寶大盜嘅真實積犯，親身道出他犯案心態與犯案後的感受，好似《新聞透視》都未睇過！
DVDPro
電話：23326326
地址：旺角奶路臣街6E德發商場地庫B4舖
