安寧數碼（128）3月20日曾推介，擺喺下邊第二件，呢勻業績有驚喜，擔正做主打，再跌兜底。安寧啱啱公布04年度（12月止），虧轉盈賺1362萬元（03年度蝕3407萬元），最巴閉係，安寧04年度中期，重係蝕緊461萬元，但全年度就扭轉劣勢。
安寧04度年報未出街，但約莫可以估計，盈利主要來自揸住4.5%中華汽車（026），為安寧提供上千萬元股本增值，其餘盈利，則嚟自時裝業（04年中期溢利885萬元），再七除八扣小量撥備，全年計，可以獲利兼虧轉盈。家陣安寧透過絲韻（Swank）品牌，發展高檔服裝業，已喺香港開咗21個零售舖，炒「5.1」黃金周，安寧有佢份。安寧往績PE37倍，係高咗啲，但安寧係少數有資產折讓（48%），兼現兜兜擁淨現金逾5億元嘅零售概念股，可以彌補PE高企不足。Before5.1前，建議兜底價0.26元。
百利保（617）04年度（12月止）純利上5.1億元，PE低企兩倍水平，但股價掉頭向下，又講兩點。第一，世城系重點項目富豪海灣，138個單位，自03年以來，已售88個單位（63%），若全數套現，旗下富豪（078）可以回撥逾20億元，百利保應佔約4億元。按已推售比例計，百利保亦可回撥2.5億元，但兩年來，百利保回撥先得9100萬元，即係話，百利保其後年度，來自富豪海灣回撥，先至肥仔。第二，世城系三傑，世城（355）NAV呈溢價，富豪折讓16%，百利保則高達60%，邊隻抵買？趁呢期大市飄搖，百利保再跌，喺03年以嚟中期支持軌0.17元水位兜底。
錢雋