《大長今》的閔大人池珍熙不但深得師奶fans和城中名媛歡心，就連六十六歲的鄭尚宮呂韻季和年僅十一歲的小長今趙貞恩，原來亦勁冧閔大人，昨日這對老嫩孖寶來港接受訪問時，大讚閔大人有型靚仔，而鬼馬的鄭尚宮還當眾取笑小長今是否想下嫁閔大人呢！
憑韓劇《大長今》甚得觀眾歡心的「鄭尚宮」呂韻季和「小長今」趙貞恩，昨日應韓國觀光公社邀請訪港四天，但未知大會是否見大批傳媒等候，擔心場面太過混亂關係，安排鄭尚宮與小長今由秘道離開機場，令數位一早在機場等候的小fans大失所望。
鄭尚宮與小長今離開機場後先到下榻的海逸酒店稍作休息，至下午三時半左右，身穿牛仔褲及粉紅T恤的小長今，與黑色套裝打扮的鄭尚宮，乘坐韓國雙龍新款房車前往商台接受訪問，十多位小fans一見小長今即上前要求簽名及送上禮物，場面熱鬧。抵達商台後，DJ劉偉恒安排了叉燒包、油炸鬼和魚蛋等地道香港美食給小長今和鄭尚宮品嘗。
年僅十一歲的小長今面對傳媒時表現淡定，就連進食也保持儀態；至於鄭尚宮雖然年屆六十六，但卻十分鬼馬和開朗，不時扮聲逗傳媒發笑。及後二人再接受劉偉恒訪問，問到鄭尚宮對李英愛和池珍熙印象時，鄭尚宮說：「李英愛好靚，好似天使咁。拍戲期間大家成日玩，但李英愛就冇，佢做嘢好認真。至於閔大人，佢雖然係新人，但好有吸引力，好有型。」
原來不止鄭尚宮，就連小長今亦大讚閔大人說：「池珍熙好有型。」其時鄭尚宮竟插嘴說：「佢咁有型，你有冇諗過嫁畀佢呀？」小長今即連聲否認：「咁又冇。」小長今又表示希望將來成為國際大明星，甚有抱負呢！說到拍攝《大》劇最難忘之事，鄭尚宮揚言是假髮太重及天氣太凍，而小長今則說：「係講我媽媽死嗰一幕，由於山上面好凍，頭髮又俾膠紙黏住，我真係辛苦到喊出嚟。」
此外，無綫昨晚於海逸酒店設宴為這一老一嫩洗塵，出席者除總經理陳志雲外，還有港姐徐子珊、朱慧敏和符思思等等。
採訪：卓寶花
攝影：林德雄、娛樂突發組
