有對娛圈情侶拍咗拖都好多年，但佢哋離離合合亦好多次，寶島女星原本對靚仔紅星死心塌地，但可惜靚仔紅星又真係太過風流，呢幾年不斷識其他女仔，佢個寶島女友每次知佢同其他女仔搞埋一齊，一定同佢大吵一鑊，然後就掟煲，但每次分手冇耐，靚仔紅星又會死死氣去認錯，咁兩個人之後又會走番埋一齊。最近佢兩個又鬧分手，不過好似玩真，女方重識咗個圈外男友㖭。
聽寶島女星閨中密友所講：「今次佢兩個分手好似都幾認真，以前佢哋鬧分手，女方係唔會認真同其他男人拍拖，但今次就唔同，佢肯接受追求，重同個圈外男仔來往得幾密，而靚仔紅星亦唔寂寞，聽聞又追緊另一個新目標。」
林熙蕾噚日突然間出現喺紅磡海逸酒店，一見到記者影相，即刻用手掩面，重急步咁跑上保母車，問佢嘢又唔多答，不過都笑笑口。經查探下，原來佢係為電影《文雀》開工，其實林熙蕾出入酒店都係開工啫，使唔使咁鬼祟呀？
薛家燕（好姨）噚日喺將軍澳宣傳腳部按摩器，佢話早排去咗上海傾美容廣告，趁空檔去咗購物，點知竟唔小心將其中一件手提行李漏咗喺的士，好姨話：「因為我冇拎發票，所以搵唔番個司機，我袋行李都有貴重嘢，損失接近一萬蚊，𠵱家已經報咗派出所，但重未有消息，惟有請朋友幫我跟進。」
林志玲噚日坐吉普車喺台灣鬧巿宣傳健康訊息，由於好多巿民圍觀，吉普車只可以用時速五公里前進。行緊嗰陣有巿民衝出馬路影相，險象環生，有男性fans重大喊「林志玲我愛你」，林志玲唔知點好惟有猛伸脷。
馬景濤喺台灣涉嫌襲警被捕，佢噚日嘅心情平復咗好多，接受記者電話訪問時以國語講話：「我向社會懺悔，我祈求心靈上的力量、給我生活動力，有很多工作等着我，我會打起勁加油。圈內好友的支持，讓我感受到患難見真情。」
著名鞋履設計師ChristianLouboutin前晚舉行鞋展，吸引一班模特兒如AnaR.捧場。AnaR.話好鍾意着高跟鞋，佢話：「我覺得女仔着短裙配高跟鞋，雙腿會特別修長同sexy，我第一次同男友Bryan（周立璟）約會，都係咁着。」
林峯前晚喺將軍澳電視廣播城參加《百法百眾》錄影，佢透露稍後會接拍一套劇集，林峯話：「我會扮一個患絕症嘅醫生，我之前喺《天涯俠醫》都演過。」對於郭羨妮因連續有三套劇返內地拍攝，留喺香港嘅時間好少，所以唔使交稅，林峯就話一啲都唔羨慕，佢話：「我寧願交稅，喺內地拍劇好辛苦。」
