孫耀威過去十二年歷盡甜、酸、苦、辣，紅過、跌過，頭頭碰着黑過，幸好一切雨過天青，往中、台拍劇掘完金回流發展之餘，還認識了緋聞女友應采兒，孫耀威提起對方時情難禁，臉紅耳熱地說：「我係好需要愛嘅人。」
孫耀威飄泊中、台拍劇多時，到近月回流返港拍攝亞視劇集《美麗傳說2之星願》期間，因與拍檔應采兒傳緋聞而令他再被注視起來。
孫耀威日前接受本報專訪時說：「過去嗰四、五年，加埋留喺香港嘅日子都唔知有冇三個月，係有啲辛苦，但𠵱家有回報，都開心㗎。」至於酬勞方面，他更說：「比起我幾年前拍第一套台灣劇《懷玉公主》時，𠵱家嘅價錢係跳咗三倍。」
今天的略有所成，其實是孫耀威十二年來嘗盡甜、酸、苦、辣後換取回來。當年他就讀中文大學期間，以學生王子形象推出首張廣東碟《愛的故事上集》即告竄紅，但經過五年的順利發展後，事業突然下挫，他人生中最運滯的事情都在兩年內發生。
孫耀威娓娓說道：「其實我每張唱片都賣到好成績，我九八年喺香港出最後一張碟都賣咗十萬隻。喺九七年，我一年就出咗成六、七張碟，有廣東碟、國語、英文、日文，嗰時我同台灣唱片公司重有一個月約滿，同日本嘅唱片公司嘅約就過咗期，日本嗰邊猛咁催我出碟，但我覺得合約都未傾錄乜新碟呢？都唔啱規矩！」
孫耀威續說：「當時台灣嘅經理人叫我過日本做握手會，去到之後我至知原來係開演唱會，我都冇準備，而且有好多嘢唔合理，於是我鼓起人生最大嘅勇氣，喺開演唱會之前嗰晚，同助手講我聽日失蹤。點知第日唱片公司搵咗幾十人去機場伏我，我睇準機會就衝入閘，成功走甩咗。後來我睇網，知道演唱會要退飛，都幾激㗎！嗰次係台灣同日本嘅公司恰我，諗住我唔出聲，冇約都叫我做嘢，錢就照收，真係好唔公平！」
發生逃兵事件後，孫耀威先後去了美國及加拿大，當時他的圈外女友居於洛杉磯，他打算退出娛樂圈考取碩士學位，豈料又好事多磨。孫耀威說：「嗰時我同女朋友一齊返香港玩，喺屋企影咗啲好親密嘅kiss相，女朋友已經攞番去LA曬，我叫佢曬多份寄返嚟香港畀我，但我等咗成個月都重未收到啲相。」
孫耀威憶述說：「直至有日，有個男仔打電話嚟我屋企，佢話佢手上有一叠我嘅相，我約咗佢嚟我屋企嘅大堂見面，原來佢只係一個細蚊仔，佢話啲相係佢女朋友嘅，打算賣畀雜誌登，但個男仔覺得女友咁做好唔啱，問我可唔可以畀五萬蚊佢，當係向女友交代咗就算。我話你咁係勒索我，我報警你要坐監㗎！個男仔話要返屋企諗，好彩最後佢都終於畀番啲相我，我亦冇報到警。」
孫耀威又說：「之後隔幾個月又有單嘢發生，我爹哋一向身體好好，無端端喺一個星期之內入咗三次急症室，係心臟病發，嗰時我真係好彷徨、好唔開心。」
這段黑暗日子持續了兩年，到一天有製作商找孫耀威拍攝台灣劇集《懷玉公主》，他滿以為劫後重生，卻原來一起步又是一場噩夢，他說：「我喺內地拍外景時墮馬，隻馬發晒癲，飛咗我落地下，我掃爛晒成排木櫈，隻馬成千磅，重坐咗落我個身度，我即刻昏迷，成身內出血，好金呀，第日即刻送我返香港入醫院，好彩又大步檻過。」
採訪：朱倬誼 攝影：林德雄 髮型：BillyChoi@HairCulture 場地：濠涌Golf
