上星期講到金像獎風波，今個星期冇乜再聽到八卦嘢，希望爭拗已經完結。自己亦都檢討過上星期嘅專欄會唔會對影評人協會不公平，所以希望今個星期可以講講對電影評論嘅一啲睇法。
首先大家要搞清楚，寫影評嘅人並唔係電影從業員，亦唔應該係電影從業員，雖然有部份業內人士會寫，但係我覺得佢哋應該分清楚自己身份，否則難以令人信服。電影與電影評論應該係兩個完全分開嘅行業，唯一嘅聯繫建立在電影本身與文字上。
電影業經營困難重重，人所共知，自有內在原因。其中有部份人歸咎影評寫得唔夠好，扼殺電影業。甚至有人登啟事去回應影評，真係講出嚟都笑死人，我以為以上事情只會發生在互聯網內一些不用負責的留言信箱中。製作人唔去檢討電影本身拍得夠唔夠好，反而去意圖出口術干擾影評寫好啲。等於董建華式行為——「唱好香港。」。你話係咪笑死人？
寫影評本身係一個非常專業嘅工作，背後需要有豐富嘅學術知識，加上大量觀影經驗配合客觀立場的分析，在西方國家是一個極受尊重的行業。香港嚴重缺乏認真討論電影的報章雜誌，多年來只有《電影雙周刊》獨力支撐，再加上一隻手數晒嘅專欄。影評實在難以找到一個平台建立自己的睇法。轉移向消閒雜誌發展亦得不到讀者認真對待，互聯網上尋找出口變成你講一句，我講一句，只可視作觀後感。
所以電影與影評大家各有各難，唔好再你鬧我，我鬧你。集中精力，搞好各自範疇，至係辦法。