美股拖累，恒指散133點。即月期指低水48點，5月期指則大低水194點，唔多好睇。昨日講過，恒指成份股下月除息總額265億元，相等於恒指84點或0.6%。計埋呢個因素，5月期實際低水110點，大市個樣仍然有啲問題。投機市場嘅嘢，一如人生，順中生逆，逆中有順，期指大低水，有時代表掟過頭，出現反彈亦未可料。
恒指P輪3582：大市咁散法，自然係P輪天下，龍虎榜上排頭10名者，恒指P輪佔1半，3726霸頭位，收11仙，升45%，有11球易手。隻輪6月尾夠鐘，溢價5.5%，槓桿率44.3倍（有效16.4倍），引伸波幅18.9%。計埋除息因素，溢價都係過高，要博恒指P輪，3582較為啱睇。
3582喺5月底到期，輪價12.8仙，溢價1.7%，槓桿率17.2倍（有效13.4倍），引伸波幅17.7%。想刺激啲，贏輸大啲，則揀3581。
國壽P輪3706：國壽（2628）守唔住5元大關，收4.95元，跌5仙，張成績表下周一見人，估計唔靚得去邊，市場反應估計係向下多過向上。
搵國壽P輪短炒，3706係正路之選，6月尾到期，輪價48.5仙，溢價0.7%，槓桿率10.2倍（有效7.9倍），引伸波幅23.4%。國壽P輪中，成交金額最大係佢，有12球以上。國壽C輪最熱門係3524，金額有接近10球，11月到期，雖則槓桿率有48倍，但溢價29%，會飛咩？昨收10.3仙，散22%，咪貪平，買落去，輸多過贏。
章盛