早前有網上消息指鄭秀文（Sammi）淋巴出現問題，她前晚在上海出席新片《長恨歌》記者會，臉容浮腫的她解釋只是患上腮腺炎，但已痊癒。 記者曾小嘉上海直擊
鄭秀文、梁家輝、成龍和導演關錦鵬等，前晚在上海出席新片《長恨歌》的記者會，早前網上流傳Sammi淋巴出現問題，她前晚臉容浮腫現身記者會，Sammi自稱只是患上腮腺炎。Sammi前晚在脖子上圍了一條粗頸巾出席記者會，其間不停飲水，她的助手還遞上盛有飲料的保溫杯。傳媒追問Sammi時，成龍和梁家輝等人即同聲護駕。
問到Sammi的身體狀況，她以國語說：「我的身體非常好，過程是有生病，請了假一段日子，但多謝朋友關心，我會努力搞好身體，繼續拍下去。」對於集眾演員寵愛於一身，Sammi說：「咁大家相處咗咁耐，佢哋熟習我個性啫，我係大病咗一場，成兩個幾星期，我係患腮腺炎，都好番晒，但重有啲臉腫頸腫，都唔使再去覆診，亦冇食藥，只要唔太早起身就好。」Sammi否認聽過網上傳她淋巴出現問題，她又說：「我唔會理呢啲報道，亦唔會令我唔開心。我每朝七點起身跑步。」
Sammi又自爆患病期間曾寫信給關錦鵬，而關錦鵬前晚向記者說：「Sammi叫我唔使震騰騰，當時部戲拍咗三分二，我都擔心佢拍唔到落去，Sammi淨係話叫我畀時間佢休息調理，好快返嚟拍戲。」而《長》片還有兩星期戲便煞科。有份投資的成龍則表示與關錦鵬先後合作過三部戲，他說：「第一部係梅艷芳嘅《胭脂扣》有攞獎，第二部係張曼玉演嘅《阮玲玉》攞咗金馬、金像、柏林同日本影評人大獎共四個獎，呢次Sammi拍《長》片，我希望佢更上一層樓。」成龍更公開大讚Sammi：「你都辛苦，但會有回報。」成龍坦承《長》片已超支五百萬以上，但仍未計出實質數額。
聽到成龍大讚是張曼玉接班人，Sammi說：「好多人唔了解我，影后呢啲嘢時也命也，部戲就算去唔到康城，都唔代表差，自己好大壓力，早排搬屋，我匿喺酒店三個月學國語。張叔平都怕我癲咗，我冇抑鬱，只係『奄悶』，我嘅個性幾難有抑鬱。」
而Sammi昨日就和吳彥祖在上海街頭拍外景，吳彥祖以「奇勒基寶」的造型踏着單車，然後載着剛懷孕的Sammi，她更取笑自己的造型老套。
