星期三下午向老友打聽夜馬貼士之際，收到老波骨嘅電話，唔係講馬，而係哭波喪，因為佢星期二晚下注拜仁慕尼黑對車路士兩家打和，馬會賠率三點三五倍，踢到八十九分鐘，車路士仍然領先二比一，諗住都係輸錢咯，點知第九十分鐘，拜仁扳平二比二，老波骨高興到跳起，幾乎嘈醒咗老婆，但補時好耐，去到九十四分三十幾秒，球證仍然未吹雞完場，老波骨以為執梗啦，點知拜仁竟然多入一粒，反勝三比二，然後球證吹雞，夠鐘！老波骨激氣到破口大罵球證，於是真係嘈醒咗老婆，俾老虎乸鬧：「賭輸咗波，虛火上升呀？快啲上床！」
老波骨虛火足一日，星期三下午買到份「壹仔」，內有故事講曾蔭權，刊登咗曾蔭權父親曾雲幅相，佢一睇，又撞火，打電話畀左丁山：「喂，我舊時睇波，喺花墟球場有時撞到陳福祥幫辦，佢就係負責帶領警察足球隊嘅，警察全盛時期有龔華傑、摩士，與星島張子岱、張子慧兄弟在大球場大戰，轟動一時……」左丁山掛住搵貼士，叫佢唔好咁多聲氣，留番啲精神研究祖雲達斯與利物浦場賽事重好啦……老波骨大喝一聲：「我唔係講波呀，講未來特首曾蔭權呀！《壹週刊》將陳福祥張相登出來，當佢係曾蔭權老竇曾雲，擺晒烏龍，笑死人呀！」
左丁山為之失笑，據老波骨講，曾氏兄弟之中，曾蔭培個樣最似老竇，曾蔭權另一位細佬已經移民加拿大Richmond嘅，彼此最相像，稍經化裝，外人會分唔出兩人之中，邊個係曾蔭權。老波骨睇波四十年，估唔到仍然老馬有火，鬧啲後生仔冇經驗，誤把馮京作馬凉。左丁山冇心機聽佢鬧「壹仔」，問佢有冇刨馬，老波骨話：「第四場二號利之寶馬主係利物浦舊生，有機會㗎，如果贏咗，晚上就押注落利物浦度！」此文見報之日，你哋就知道我有冇贏錢！