可算係第一身射擊遊戲開山祖師嘅《Doom》，雖然PC版《Doom3》出咗一排，雖然畫面超正，奈何系統要求太高，閒閒哋千幾蚊買張靚顯示卡做入場費！《Doom3》剛出了XBOX版，連Game帶機嘅價錢完全等同你買張中價顯示卡，而且重新加入XBOX版專享的4人連線，金屬限量版更特別收錄了懷舊嘅《UltimateDoom》及《Doom2》！駁住16:9大電視、聽住5.1靚聲打齊三代《Doom》，真係爽死！
記者：朱崇德 攝影：陳盛臣
遊戲類型：第一身射擊
遊戲人數：1人（可2至4人連線）
XBOXLive支援：線上多人遊戲、語音通訊、遊戲內容下載
對應機種：XBOX
系統支援：杜比5.1數碼音效
出版商：VicariousVisions
開發商：Activision
唔經唔覺，第一代《Doom》原來已屬12年前作品（1993年），血腥、暴力、解謎甚至到遊戲介面，時至今日幾多名氣第一身射擊遊戲，都跳唔出佢呢個框架！今次XBOX推出家用機版《Doom3》，可以話畀一眾機迷一道方便之門，每次因為追Game而Upgrade電腦真係唔太化算；另外提吓一眾Mac友，《Doom3》Mac版都係今個星期推出，據稱G4（1.5GHz）已有唔錯表現，如果玩上Dual2.5GHzPowerPCG5配GeForce6800UltraDDL，更可能係《Doom3》現時最終極畫質嘅表現！
攞命電筒 招鬼來
《Doom3》的遊戲故事背景，發生在2145年的火星，當時人類在火星上建設了太空基地，但某一天基地受到恐怖怪物的襲擊，而人類卻顯得束手無策。玩家所扮演的是倖存生還者，任務是盡快通知地球及要求增援。
基本玩法同前兩代的《Doom》好相似，解謎、執武器再殺怪物！不過相對故事性今集最完整；令老機迷最欣喜者，是好多怪物都係舊設計再加以改進，邊打邊估佢係邊隻，真係令人回味無窮！
玩家基本武備係一支手電筒，其他經典武器包括有手槍、散彈槍、電鋸及電漿槍等；玩家被成群嗜血的恐怖怪物所包圍，大家心諗冇理由攞支手電筒做武器啫！遊戲平均度高之處，就係場景布局光暗反差位高，所以玩家經常要攞佢出嚟照照，不過結果係經常一照就「招鬼來」，真係嚇到你彈起！
駁大電視 聽5.1聲效
被譽為最強畫質遊戲之一的《Doom3》，第一次試玩，實在好難唔叫人留意佢嘅影像表現；雖然唔算達至終極表現，但480p的效果已經屬稱職以上！玩過PC版《Doom3》都會發現遊戲為咗營造恐怖的氣氛，場景中「死黑位」真係好多，落到XBOX版明顯改善處，喺點黑環境都唔會冇嘢睇，抵讚！另外XBOX版《Doom3》重可以對應杜比5.1數碼音效，須知𠵱家好多人屋企都有5.1DVD套裝機，想玩完美環迴立體聲效，真係比電腦方便好多。
另一令人關心處，應該是遊戲的操控問題，與以往的第一身射擊遊戲一樣，都係以手掣上的兩個Analog掣做轉向操控；老實講，小記都一向係PC玩家，用慣Keyboard＋Mouse，但估唔到落到家用機手掣都可以咁就手，移動反應感非常迅速，而且比PC版體貼地加入AutoTarget功能，簡單講係開第一槍擊中敵人時，準星會轉紅，Hold住開槍掣唔放，就算玩家點樣左右移動都會自動追住敵人嚟射（但第一槍唔中當然就冇戲唱啦！），係幾體貼兼令遊戲流暢度增高的設定。
新增連線合作對戰
XBOX另一大改進之處，就係遊戲可對應XBOXLive的連線功能，最多可同時支援4名玩家作線上對戰；而進行故事模式時亦可選擇二人合作過關，玩法比電腦版本更多元化。最後一提大家，今次XBOX版重特別推出了《Doom3》金屬限量版，裏面特別收錄了懷舊嘅《Doom》系列一、二兩集，在次世代主機中玩，畫面真係順暢好多，平心而論，畫質相對新版本《Doom3》當然冇得比啦！但遊戲性對比《Doom3》更高！就算如小記等老機迷，想將隱藏內容100%打出仍有一定難度，新、舊機迷都值得捧場。
XBOX（HK）
查詢電話：800964215
