今年一二月，由於等待公布新一份勾地表，一眾發展商都按兵不動，自然冇勾地申請，到上月新表出台後，好快有料到，該月即有發展商申請，想勾山頂加列山道十二號山頂樓幅地，但唔知係咪出手太低，慘遭政府拒絕。
豪宅過去年幾一直跑贏大市，大小發展商都吼實豪宅地皮，今次勾嘅，重係唯一山頂豪宅地盤，可見佢哋幾咁渴地，同埋好掌握市況。
對於呢幅寶地，九倉、嘉華、南豐都話過有興趣，但始終未能勾出。呢幅係勾地表內唯一山頂地皮，蘭西相信，政府點都唔會輕易讓發展商用平價勾出。
山頂樓七萬九千幾呎，可建樓面近四萬三千呎，由於尖沙嘴凱旋門創出分層呎價新高紀錄，美聯估計，呢幅地市值超過十億。
尖沙嘴凱旋門呎價高見三萬後，一時間成為豪宅價格新指標，發展商莫不以三萬為最低目標，尤其造價向來凌駕九龍嘅港島豪宅，叫價低過三萬，實在太唔似樣。
繼九倉轉租為售嘅山頂種植道一號，意向賣三萬後，恒基拆售中半山富匯豪庭，都話要重新定價，相連戶，咁蹺又係要三萬先賣。相對上個月賣出嘅相連單位只不過兩萬，唔夠一個月，就漲價一半。其餘賣緊每呎萬六至萬八嘅分層，就順勢調整至兩萬以上先至有得傾。
今番凱旋門效應認真厲害，三萬呢個目標席捲全港豪宅，畀發展商重新反省個盤定價係唔係過低。之不過，叫價三萬只係發展商一廂情願，市場究竟有冇咁嘅承接力，就有待分曉。
卓悅喺銅鑼灣大展拳腳，承租恩平道五十四號三個舖，每月四十三萬八，比舊租貴兩成半。
美記話，三舖八百呎，呎租近五百五，由於啓超道同恩平道一帶規劃為行人專區，鄰近崇光百貨，人流如鯽，附近有莎莎、雅施等對手，所以卓悅都唔執輸。
蘭西記得，早前有家外資跨國化妝品集團，以每月七十萬，租用軒尼詩道五一九號全幢，以及隔籬部份萬二呎舖位，比舊租高兩倍有多。
舊年底香港仔富豪飯堂突然執笠，事隔唔夠半年，上址黃竹坑道三十八號載思中心，以一億二千二百八十萬，賣畀香港興業相關公司，當日富豪飯堂唔做，唔知係咪同呢幢工廈放盤有關？
香港興業計劃喺愉景灣起酒店，憧憬迪士尼帶旺旅遊業，香港仔近住海洋公園，亦都係內地旅客必到景點，查氏喺附近買工廈，好大機會申請改建酒店，行家華懋已有前科，重補埋地價。規劃署將黃竹坑工廠區改劃商貿區，鼓勵重建酒店，發展商當然搶購地盤。香港興業買入個地盤，一萬零九百呎，可以起十五倍，即係逾十六萬呎，樓面地價七百五十蚊呎。
幢大廈○一年用三千四百萬買入，升值兩倍六，業主賺九千萬。
電郵地址：[email protected]
