港股周中升得好地地，但轉過頭美股散晒，香港亦被拖累，恒指噚日跌番百幾點，小初當堂冇晒心機。
據聞嘉華國際（173）同嘉華建材（027）將在下周復牌，難怪近日賭業股異動，但小初唔敢玩。
另外，經紀陳有新推介，佢話大陸地產代理合富輝煌（733）將於下周二公布全年業績，聽聞會好好睇睇，盈利估計有4000萬銀樓上，可留意炒業績。
合富輝煌去年上市時，因為毛利率勁抽，一度惹來質疑，但自從金手指今年1月以每股1.38元增持至接近12％後，令唔少投資者放心好多。
佢又話，合富輝煌一直好進取，業務衝出廣州去到其他省份，又增加旗下二手地產代理規模。現時市面上地產代理股唔多，最出名係美聯物業（1200），但股價已經唔平，同類股合富輝煌應該有得諗。
合富輝煌昨日隨大市回落3.24%，收1.79元，成交股數133萬股，金額238萬元。
慕容小初