亞視下個月八號推出一個類似無綫《殘酷一叮》嘅節目《一舉成名》，為發掘更多有潛質嘅參賽者，亞視噚日專登拉大隊返廣州公開招募，搵埋張文慈同珈潁等做評判。雖然噚日圍觀者只得百幾人，唔似《殘酷一叮》試叮大會咁熱鬧，但面試者都幾騎呢幾搞笑。
今次三百幾位面試者中，多數以扮嘢做噱頭，其中扮《上海灘》周潤發嘅黃先生，笑起上嚟同發哥都有幾分相似，但佢失驚無神掹兩支槍出嚟擺甫士，真係俾佢嚇親。現場又有「縮水張國榮」王先生、「肥版劉德華」華仔同「翻版學友」呂先生，其中肥版劉德華嘅唱功同小動作都似到十足十，睇到現場觀眾拍爛手掌。不過扮梅艷芳嗰位陳小姐，無論外形同聲線都冇「忽」似，睇到評判之一嘅張文慈好𤷪𤺧咁話：「我把聲重似過佢，我幾乎想搶佢支咪嚟唱咁滯。」
謝寧同張堅庭前晚喺將軍澳電視廣播城，錄影鄭裕玲主持嘅法律節目《百法百眾》。張堅庭話：「呢啲節目應該搵盧敏儀同黃錦燊嚟，佢哋講錯要除牌。」問張堅庭咁講唔怕得罪佢哋咩？佢話：「我哋有《基本法》保障，講錯咪釋法囉。」
深受港人愛戴嘅「長今」李英愛，最近憑佢嘅清新形象，再同韓國果菜汁Woongjin續約半年，雖然佢再做代言人嘅身價冇公開到，但果菜汁產品發言人就透露，李英愛獲得嘅待遇係行內最高嘅，絕對無人能及！此外，新浪網舉行嘅《大長今》最靚角色選舉中，李英愛飾演嘅長今排第一，連生排第二，韓尚宮則排第三。
近日無綫內部平賣經典劇集同節目嘅VCD優惠員工。譚小環噚日都唔執輸，喺將軍澳電視廣播城嘅售賣處揀咗幾套VCD，佢話：「我最鍾意係《幻海奇情》，但《流氓大亨》都好正。」馮仁昭重八到《書劍恩仇錄》同《射鵰英雄傳》呢啲經典已售罄。
韓國變性人組合Lady，今個月正式推出唱片，進軍當地樂壇。前晚佢哋四位成員齊齊出席首爾舉行嘅「M!Countdown」音樂會。呢次雖然係Lady第一次出席公開活動，同埋上台唱歌，但佢哋四個靚女都表現淡定，唱快歌時都能夠勁歌熱舞，兼且非常合拍。睇嚟Lady為咗喺樂壇闖出成績，已經做足準備工夫。
梁榮忠噚日接受新城電台訪問，佢話最近幫許冠文嘅棟篤笑度稿，搞到每日瞓得四個鐘。佢重透露《殘酷一叮》原本六月就完，但反應太好，所以會有第二輪。忠仔重話目標係做到全球《一叮》大賽，下月佢會同李克勤去加拿大招募華人返港參賽。
