飲食人誌︰筷子夾住食叉起涼粉變意粉

由港台Canteen話事人聰嫂與藝人梁思浩合作開設的甜品店，兩日前在寶琳開業。想吃紅豆沙、綠豆沙？對不起，這裏欠奉。餐牌上反而有薑汁意大利涼粉、龍眼椰果西米露、士多啤梨豆腐花等新奇甜品，賣相最過癮莫過如薑汁意大利涼粉，涼粉做到意粉一樣條條幼身，用匙羹𢳂嚟食？Sorry唔得喎，用叉捲起食、用筷子夾住食就差不多！

記者：李淑芬　攝影：楊錦文模特兒：Kiti（D8）、阿儀

廣播道出晒名

無論聽商台或港台節目，間中會聽到DJ們提及港台Canteen的餸菜有幾好食，但一般聽眾又有幾何會入到港台用餐？兩日前，港台Canteen話事人聰嫂及聰哥，聯同梁思浩，在將軍澳寶琳開設一間甜品舖，我們終於有機會一嘗廣播道名食。開業首天，慕名而來的食客眾多，下午四時已坐滿大半間舖，算旺場。
聰嫂邊舀糖水邊說：「我好鍾意食糖水，開糖水店一直係我心願，喺港台Canteen做咗十幾二十年，近三年開始煲埋糖水，無吹水㗎，大家都話水準好，咁咪自己開番間囉！」在眾多食客支持下，這間籌備整年的糖水店終於開業。將軍澳是新發展區，人口多住家多，加上TVB也在將軍澳，店子不愁沒客路，以前在廣播道捧慣聰嫂場的熟客，現在又多笪地方試到她的廚藝了。

■除電台DJ外，連陳婉嫻議員也特意致送花牌。

自創款式私房甜品

店子以「私房甜品」命名，因為這兒的糖水款式是聰嫂所創，客人入來想食普通糖水，可能會有點失望，聰嫂說：「做普通糖水只係就咁煲煲煲，好悶嘛。所以我做嘅糖水一定要有特色，材料不會煮得太爛，重要逐碗整，食落最緊要有𡁻頭！」除薑汁意大利涼粉外，龍眼椰果西米露也屬鎮店之寶，汁底用30至40粒泰國龍眼打茸，粒粒人手剝殼，食落不但有清香龍眼味，還有細細粒龍眼肉碎，好味又清潤。「私房甜品」的工序也比坊間一般糖水店繁複，以核桃露為例，核桃要先用油炸，再過15分鐘清水沖去油份才再打磨，所以即使是做糖水，店子都攞正食肆大牌，用明火煮食。