論少女的潮爆飾物，非備受明星力捧的Prince&Princess飾品莫屬，各位蒲慣時代廣場的朋友，當見到店址圍起圍板一派裝修格局，必定感到失望，其實店舖已搬往同層的另一店舖繼續營業。為了慶祝新店重新開張，老闆娘決定將場內的新舊貨品，全部以四折起的價錢發售。當中最矚目的，必定係連張曼玉都勁冧的皇冠耳環，想以超值價扮公主，今次必定唔可以錯過。
記者：區佩嫦
攝影：林栢鈞
模特兒：Kendy
曼玉都冧閃石皇冠耳環
一向都知女明星極愛Prince&Princess的首飾，但無諗過連影后張曼玉都冧。呢對耳環就係上年張影后出席《錯愛又如何》首映時，用嚟襯佢條招牌葫蘆頸鏈及玉寶表的皇冠耳環。鍍銀的皇冠鑲滿閃石，高貴中帶點少女味。
長耳環搖曳生姿
長耳環深得不少少女歡心，加埋皇冠，有邊個少女戴上耳後會捨得除低？這款公主皇冠耳環，冠身鑲上三粒粉紅色的彩石，配埋垂吊着的星形小石，夠晒別致。
立體皇冠頸鏈
平面皇冠的飾物多的是，立體的皇冠又別有一番味道。這款立體皇冠頸鏈，全條用鍍銀製成，皇冠的四面均鑲上不同顏色的彩石，配埋銀珠頸鏈，感覺超豪。
閃石公主皇冠手鏈
以鍍銀製成的公主皇冠手鏈，全個冠身鑲滿不同的粉色碎石，極具少女味道。鏈身更以多條鍍銀銀鏈串連而成，夠晒特別。
閃到暈后冠鏈墜
鍾意閃到七彩的碎石款式，不妨選擇這款后冠頸鏈。全個后冠鑲滿紅、白、綠、藍等彩石，有大有細，搶眼度十足。配埋冠上的十字架，極度華貴，愛誇愛花巧的你又怎可錯過？
Cutie花花珠鏈
唔好諗住店內除咗皇冠別無選擇，其實還有不少充滿少女味道的飾物任你揀。好似呢條珠鏈，珠花以4粒粉紅色的心形珠串製而成，用來襯背心最啱。
手指都閃閃發光
連手指都可以戴皇冠，真係唔講得笑。呢兩款皇冠形戒指，同樣在鍍銀的冠身鑲上閃石，戴上手又閃又搶眼。
小皇冠髮飾
戴小皇冠在店內影相已成為明星的指定動作，可見皇冠的吸引力有多大，今次居然以四折發售，的確幾抵。好似呢兩款小后冠，鑲滿珍珠及白色閃石，戴上頭必定引人注目。
布髮夾啱小朋友
呢幾款布製髮夾，送畀小朋友就最啱。髮夾以短身毛毛布製成，上面綴以繡花及珠片，充滿濃濃的Candy味。
自家設計系列
Lady手挽袋
自家設計的黑×粉紅系列，有齊手挽袋、化妝袋、相機袋及筆記簿。呢個手挽袋就最受歡迎，黑色的絨布繡上粉紅色的英文招牌，然後再綑上粉紅喱士，超級勁Lady。
毛毛首飾盒
女兒家最多首飾，無理由用個殘舊盒仔裝住。呢個毛毛首飾盒有兩個小櫃桶，可放大小首飾，盒蓋打開後更可變成鏡，邊戴首飾邊扮靚。
無眼睇公主眼罩
唔想俾人見到你瞓覺時的醜態，不妨戴住呢個眼罩。以薄身夾棉布製成的眼罩，罩上繡上Princess字樣，戴上後瞓覺，自然會發到灰姑娘的好夢。
旅行狂必備
周遊列國的你，旅行喼必定貼滿各航空公司的貼紙。不妨喺旅行喼上掛上呢個行李牌，牌背有空位可以寫上自己的姓名和地址，備有皇冠形及長方形選擇。
公主王子手帶
同樣為自家設計的膠手帶，啤有公主及王子的招牌樣，搞鬼又易襯衫。備有粉紅、棗紅及藍色選擇。
ThePalace,Prince&Princess
日期：由即日起至5月2日
時間：11:00am-10:00pm
地址：銅鑼灣時代廣場9樓918店
銅鑼灣謝斐道銀座地庫商場40號舖
電話：25063001/28360887
付款方法：現金、易辦事、VISA及MASTER