新的特首煲呔未登基，右丞相許仕仁未上位，啲友好人士已經喺度度緊個升官圖，睇吓邊個馬廐嘅人會官運亨通啲。
一講之下，先至猛然發現，當年以陳四萬為首嘅手袋黨不單只未全軍覆沒，而且仍有影響力，其中公務員事務局常秘黎高穎怡更係掛頭牌，皆因所有D8以下嘅公務員要升職（包括升D2、D3、D4同D6），都要經佢阿姐當主席嘅晉升委員會開board決定；重有佢以前係老許嘅頭馬，呢個今時今日更加值錢。
行問責制，最大嘅得益者就係班政務主任。舊時好難先爬到個D8位，𠵱家就無端端發達咯，十一局之下有成十四個D8位，全部都叫常秘，當中就有一半係由女高官擔任，數吓啲大名大家都滾瓜爛熟，有黎高穎怡、俞宗怡、李淑儀、羅范椒芬、尤曾家麗、李麗娟同劉吳惠蘭，咁呢幾位阿姐全部都見過世面，位位都係叻女，俞小姐當年更係最年輕女局長，喺公務員系統中地位崇高，曾被培養做小掌櫃，可惜世事難料，結果俞小姐同羅范以及李淑儀一樣，寧願留下做公務員，亦唔肯再上一層樓當問責局長。
有知情者話，女高官平分天下亦係意料中事，因為過去一段長時間，加入公務員隊伍中嘅女性愈嚟愈多，久而久之，都會上晒位啦。
八方笑老許個契女黎高穎怡Rebecca有前途，但係睇真啲，煲呔嘅馬廐都唔輸蝕，因為負責審核升上D8嘅board仍然由王永平當主席，呢個位仍然非常具戰略性，至於班政務主任，以前都係佢下屬，唔少更係佢一手提拔，𠵱家肯定係報恩之時啦。
傳真︰2623-9278
電郵︰[email protected]
