潮流興兩文三語，民航處處長羅崇文今年就搞搞新意思，將星期五定做「普通話日」，希望職員每逢星期五盡量「煲冬瓜」。羅處長話，佢班職員成日要用英文溝通、開會，英文自然唔成問題，廣東話係母語，更加難唔到佢哋，但就唔係好多人講到流利嘅普通話，有時同內地航空界開會，國語的確「不太靈光」。
講開又講，民航處都有好多外籍專家，處長話佢哋好多都唔識講普通話，但有一啲人就識得講少少廣東話喎！
唔使奇怪，事關識講廣東話嗰班老外，原來係因為有個本地女朋友，唔怪得佢哋咁有學廣東話嘅原動力啦！
傳真︰2623-9278
電郵︰[email protected]