薛凱琪每次入廚都總把廚房變成戰場，令其母驚嚇得呱呱叫，故家中廚房早已成為她的禁地，但為表孝心，薛凱琪日前特隨師學製拿破崙甜品，準備在下月八日母親節當天顯身手，供母品嘗，而她更計劃舉家唱K，母唱女跳同慶佳節。
薛凱琪（Fiona）主演的處女電影《早熟》及劇集《學警雄心》快將上映，加上新碟又推出在即，所以下月她會極度忙碌，要一次過進行歌、影、視三方面宣傳，但日前她仍抽空到銅鑼灣一間法式餐廳，隨師學製拿破崙甜品，準備在下月八日母親節當天大顯身手，炮製甜品給母親品嘗。
Fiona自言對廚藝具天份，拿手菜式有清酒煮蜆、撈公仔麵及芝士火腿炒蛋，不過每次她入廚後，總會把廚房搞亂，Fiona說：「我『哩啡』呀，入親廚房都好似打仗，媽咪次次都叫我咪煮，搞到個廚房亂晒，佢會呱呱叫㗎。」
問Fiona送甚麼給媽咪作為母親節禮物？她說：「暫時未諗到，媽咪好怕迫，齋陪佢都好開心，或者唱吓卡拉OK，我試過同爹哋媽咪三個人唱K，佢兩個都鍾意唱歌，咁我拍嗰啲卡拉OK版嘅MV，佢哋喺屋企冇得睇，去卡拉OK就有得睇，媽咪唱歌我跳舞。」
Fiona表示與父母關係相當不錯，但自加入娛樂圈後，因為工作忙碌，沒時間休息，令母親大感心痛，Fiona說：「媽咪見我捱得辛苦、同埋有負面新聞嘅時候，佢知我唔開心，但唔會攞出嚟講，佢知我會尷尬，只會默默支持。我返屋企就煲嘢畀我飲，準備我第二日着乜嘢衫，真係好關心，所以我一放假，都會盡量陪媽咪。」
採訪：朱倬誼
攝影：陳偉權
場地：Joint十五
