最近有本英國健康雜誌搞咗個調查，選出球員最肥仔嘅超聯球隊，結果富咸「不幸地」當選！領隊高文為此勃然大怒，因為咁搞法，會俾球迷以為佢哋班球員唔夠專業、好食懶飛嘅感覺。
事實上呢個調查嘅準則亦值得質疑，原因主要係以身高及體重比例作準，大隻佬都會被當成肥人一族；富咸方面就指佢哋班球員係俾高文操到肌肉發達，並唔係肥喎！
我求大俠亦唔覺得富咸球員係特別多肥仔嘅；睇番其他超聯球隊球員，好似保頓嘅甘普、希亞路、熱刺嘅尼比特、安迪列特等等，咪重畀人肥仔感覺！不如計荷包肥仔吖，我求大俠一定投車路士球員一票！
費利亞洗脫污名
車路士領隊摩連奴喺歐冠盃被罰停賽，之前傳出該隊體能教練費利亞，喺冷帽入面收埋個耳機，同場外嘅摩連奴聯絡；歐洲足協喺周二晚八強次回合作客拜仁嘅半場時間，同費利亞入咗間房，要求佢除咗頂冷帽睇睇，結果乜機都搵唔到！你估費利亞識變魔術，定係傳媒捕風捉影呢？
教頭軍訓谷體能
禾夫斯堡原來有份問鼎德甲聯冠軍寶座，點知喺下半季走晒樣，𠵱家淨係可以爭歐協盃資格；而佢哋教練吉列斯為咗令班球員弗啲，當佢哋兵咁操，要佢哋喺練習時行繩網同埋爬牆。吉列斯咁嘅練習方法係好新鮮，但我求大俠擔心班人俾佢搞到手軟腳軟，到頭來弄巧反拙重弊㖭。
皮亞斯「社工」典範
曼城自從由暫代領隊皮亞斯帶隊後，不但脫離護級邊緣，更慢慢踏入中游位置。皮亞斯就公開佢成功原因，佢話要當自己係一個社工，盡量關心每個球員，所以先得到球員信任，同埋全心全意比賽。皮亞斯𠵱家爭取球會同佢簽長約，睇嚟呢位「社工」肯定畀心機輔導球員囉！
木狼「兩老」執定包袱
上年殺入西岸決賽嘅木狼今年成績狂瀉，睇怕連入季後賽都凍過水，難怪班主泰萊大呻話後悔簽咗「兩老」：卡素爾同史比維爾，搞到𠵱家成績一落千丈之餘，重要孭起佢哋成千幾萬美金嘅薪酬，睇嚟「ET」卡素爾同「Predator」史比維爾，今個夏季十成都要執包袱走人囉！