是日恒指由低位回升64點，埋單只係唔見27點，即月期指更加只係微跌1點，擺脫美股下挫影響。港股市底似乎好樣，好友唔使太擔心。
中企C輪3716：昨日推介中企指數C輪3716，撞啱隔晚外圍油價銅價鋁價下跌拖低石油股與原材料股，國企指數散56點（1.2%），3716自然冇運行，收8仙，散18.4%。跌價刺激需求，隻輪成交量由50球大增至108球。
國企股唔適宜睇得過淡，3716值得趁低分段買入，博反彈。隻輪6月尾夠鐘，溢價3.4%，槓桿率30倍（有效14.1倍）引伸波幅21.9%。
中電信C輪4500：中電信（728）平收2.80元。中電信上月底派成績表後，芬佬收貨，可以睇好。吼住間中忽然回落之時，收啲C輪。中電信C輪以4500最活躍，有34球易手，10月到期，輪價21.9仙，溢價7.1%，槓桿率12.8倍（有效6.9倍），引伸波幅27.5%。唔使心急上車，見回到20仙邊邊買入。
恒指輪溢價：恒指4月到期C輪與P輪，總共7隻，時近末日，已經冇乜買賣，炒家戰場係5月及以後嘅窩輪。
昨日股市跌到最低嗰陣，5月期指低水去到120點，好嚇人，埋單低水101點（4月期指則係高水43點）。原來5月份除息嘅恒指成份股共有15隻，派息總額265億元（老李4件佔咗123億元幾乎1半），相等於恒指84點或0.6%。所以5月份期指實際只係低水17點，唔係咁嚇人。炒恒指輪，C嘅溢價要加0.6%，P嘅則減0.6%。
章盛