老套啲講句，科技一日千里，當然未必瓣瓣追得到，不過作為潮流人，至少起碼得個知字。講緊係出自adidas最新專業跑鞋，鞋名叫adidas1，叫得做1，大概係因為係史上首對人工智能跑鞋。功能上嶄新突破，此跑鞋內置電腦晶片，利用電線摩打自動調節避震功能，真係誇張到連波鞋都要入電池，犀利！adidas秘密研發3年，adidas1將於今天（4月15日）公開發售，限量只有幾百對，各位波鞋發燒友係咪要落街掃貨呢？
記者：胡卓琳 攝影：周旭文
電腦跑鞋adidas1
售價：$2,500（4月15日有售）
售賣點：adidas（28318443）
銅鑼灣崇光百貨4樓
雜誌力谷！
日本方面早於3月尾有售，多本日本雜誌均全力發功力谷智能adidas1上位。
森美：「對鞋炒得起！」
最愛新玩意、又下下講「移動科技」的903DJ森美又點睇？
「智能跑鞋的概念幾有趣，功能亦夠實用，對真正跑步的運動員來說絕對方便，不過對我呢啲唔跑步的人嚟講，着嚟行街實在大材少用。」咁你有無興趣買呢？「講真呢對係屬於專業的跑鞋，如果當係Fashion咁着，鞋的外形上確就有待改進。不過照睇若果智能跑鞋將成為趨勢，反而我有興趣買返去收藏，幾年後有待炒賣，因為話晒呢對都係史上首對智能跑鞋嘛！Number1喎！絕對有炒賣價值！」睇嚟森美炒股都有一手，讀者銀包有多餘錢不妨諗諗！
智能跑鞋多面睇
adidas1造型平實，緩震系統睇落有少少似剔牌對彈弓鞋Shox，都係一貫Cyber科技鞋造型，講外形就唔算潮喇，期待下一代有改進啦！
智能跑鞋逐Part解構
adidas1原理係模擬人體的反射神經，利用鞋底的感應器和磁鐵感應避震的力度，並透過鞋內的微型電腦晶片自動調節，並探測避震力度是否適中。同時，adidas1採用了摩打驅動線路系統，在跑步過程中將鞋調節至最合適的避震力度。講你未必明，索性將adidas1逐Part解構過你睇，即Check！
1.開關
側面中央位置可見的"＋"、"－"掣，其實係adidas1的電路開關掣，預備跑步時只要同時按"＋"、"－"掣，見橙色的指示燈亮着，即表示adidas1已經開動。另外，亦可以用此掣增調校避震硬度。
2.感應器
內藏感應器，量度鞋底由上至下的距離（誤差低至0.1毫米），評估負荷量，每跑4步就評估一次。呢個感應器每秒鐘可以記錄達1,000個讀數，並將數據傳遞到鞋底的微型處理器。
3.運算
中央位置的處理器就係全對鞋的命脈所在，它能夠每秒執行500萬個運算步驟，軟件會自動將負荷數據同預設值互相對照，得知避震力度是否適中。
4.緩震
側看睇到電線路，其實是摩打驅動的線路系統，轉動螺絲來調較硬度。電線連接到避震的外殼，當電線縮短，避震元件便會拉緊避震變硬，相反則變軟。
5.電池
高科技的adidas1有開關掣，要靠電源開動當然要用電，電池位置就藏於鞋櫳底部，揭開鞋墊就見到！電池喺街邊只賣十零蚊粒，可以應付連續跑100小時。
6.永久保養
隨鞋會附送一條Key，畀你手動試下個摩打有無壞。只要將條Key放於鞋踭位置的電線上，同時按"＋"、"－"掣即可測試摩打，若果無反應即係壞咗囉！快啲拎去換啦，憑單就包永久保養㗎，有壞包換！
同場加映！七彩新鞋速報
嫌adidas1唔夠Fashion唔夠搶眼唔緊要，adidas同期推出的跑鞋的ZX8000，勝在顏色配搭夠Sharp，大受潮友歡迎，3隻復刻新色登場。睇唔啱重有RockClimbing爬山鞋，同樣玩撞色，內外兼備。
售賣點：adidas（28314695）
銅鑼灣崇光百貨3樓
爬山RockClimbing
爬山專用的RockClimbing，以外形取勝，於J-01發售，屬Fashion系。
售賣點：J-01（28080501）
銅鑼灣百德新街57號地舖
