利嘉兒同佢嗰位港台高層男友周國豐，前晚喺跑馬地拍拖到茶餐廳食飯，飯後周國豐就陪女友買衞生巾，重畀埋錢㖭，真係夠晒恩愛。
前晚八點幾，周國豐同利嘉兒十指緊扣喺跑馬地出現，佢哋先去便利店，之後去表哥茶餐廳撐枱腳，當然由周國豐埋單啦。跟住利嘉兒陪男友去書報攤買雜誌，然後再去超級市場買嘢。
利嘉兒一入超市即刻飛咗去賣衞生巾嘅貨架，一手捧住三大包衞生巾，企喺後面嘅周國豐頭耷耷咁不停揭雜誌，好似有啲尷尬。不過利嘉兒好少理，只係專心研究買邊隻好，睇睇吓重將手上三包衞生巾放番原位，揀過另外兩包，最後亦係由男友畀錢。
利嘉兒攞住佢袋「戰利品」，同周國豐一邊食雪條，一邊手拖手返跑馬地嘅同居愛巢。
佢哋行經閂咗門嘅地產公司時，一齊停喺門口睇樓盤行情，吱吱噚傾咗成二十分鐘，之後佢哋又撞到街坊拖狗散步，佢兩個重忍唔住即場玩狗㖭！前晚周國豐全程拖實利嘉兒，佢咁細心，唔怪得之利嘉兒成日話非君不嫁啦！
林熙蕾噚日喺台灣出席AnnaSui香水「SecretWish許願精靈」派對，林熙蕾為咗可以同華裔設計師AnnaSui見面，佢特別着咗AnnaSui嘅春夏新裝到場，佢話：「很高興能認識Anna，當我聞到SecretWish覺得很清香，連我不擦香水的都很喜歡這款香水。」
英國老牌組合BeeGees成員RobinGibb就快會嚟香港開騷，部份嘅門票收益將會攞嚟捐畀東華三院、公益金同英皇慈善基金。Robin亦計劃首次去北京、上海同廣州等地開騷，𠵱家正同中國唱片公司洽談演出嘅事宜。Robin早前獲得英女皇接見，佢嘅地位當然受到肯定喇。
馬德鐘早排同影迷去銅鑼灣唱卡拉OK，嗰日大家都玩得好盡興。馬德鐘就快去北京拍劇，佢話呢次要喺內地逗留三個月，所以抽空同影迷聚吓，影迷重答應馬德鐘生日嗰日，佢哋會組團北上同佢慶祝㖭。
今年雪碧榜頒獎禮本來喺後日舉行，點知遇着反日大遊行，主辦單位怕會造成混亂，於是改遲一日先舉行。之前呢個頒獎禮由古巨基得三個獎成大贏家，點知峯迴路轉，楊千嬅間公司幫佢爭取多一個人氣歌手大獎，加埋個大碟獎同金曲獎，總共三個獎，同古巨基平分秋色。
