郭晉安與胡杏兒日前為無綫正在播映的新劇《同撈同煲》拍攝宣傳片，向來斯斯文文的安仔一埋位即手舞足蹈表演扭籮，逗得對手胡杏兒笑到肚痛趴地，杏兒對安仔的舞步更有讚無彈。
由郭晉安、胡杏兒主演的無綫新劇《同撈同煲》現已播映中，早前安仔及杏兒於將軍澳電視廣播城拍攝宣傳片，兩人均以搞笑方式演繹。由於安仔與杏兒於劇中分別扮演鄧永祥（新馬司曾）及鄧碧雲，故兩人事前亦做了不少資料搜集，杏兒說：「拍呢套劇之前都睇咗唔少鄧碧雲嘅電視劇，盡量去學佢做戲。」
胡杏兒對於自己表現自評不過不失，她說：「其實我知點扮個樣都唔係好似，所以我盡量喺聲線方面去模仿，希望可以搞笑啲去表演畀觀眾睇。」而扮演鄧永祥的安仔則表示身形方面無法模仿，他說：「其實我都係模仿祥哥嘅唱腔，都學足八成嘅，咁我身形又唔可以好似祥哥咁瘦。」
兩人拍攝宣傳片時十分有默契，由於要表演跳舞，所以平日甚少跳舞的安仔情緒高漲，未埋位已不時手舞足蹈逗得身邊的杏兒哈哈大笑，她更對安仔讚不絕口，她說：「見親佢我都好開心，佢一跳舞就好好笑，頭先重笑到肚痛，佢好識搞氣氛，好易令到對手投入。」
而安仔亦表示由上年開始拍攝該劇到現在拍攝宣傳片均十分開心，他說：「大家真係好開心，好回味上年拍呢套劇嘅日子。」
採訪、攝影：王崇穎
